Rossiya prezidenti Vladimir Putin tomonidan Kursk viloyatiga rahbar etib tayinlangan Xinshteyn amaldorlarga Ukraina armiyasi bilan bo‘lgan janglar haqida gapirishni taqiqladi. Bu haqda “TASS” xabar berdi.
Xinshteynga ko‘ra, Ukraina armiyasi bilan jang olib borayotgan rossiyalik harbiylarning harakatlari haqida aholini xabardor qilishni to‘xtatishi lozim. U shu tariqa Rossiya armiyasi harakatlariga baho bera boshlangani, “qandaydir raqamlar, aholi punktlari soni va boshqa ma’lumotlar” e’lon qilinayotganiga munosabat bildirdi. Xinshteynning fikricha, bunga “mutlaqo yo‘l qo‘yib bo‘lmaydi”.
Barcha qarorlar bunga vakolatli shaxslar tomonidan qabul qilinadi, barcha raqamlar, baholashlar ular tomonidan beriladi. Boshqacha o‘ylovchilar pogonlarni taqib, bu tizim to‘liq ishlaydigan joyga borish imkoniyatiga ega. Kim o‘zini harbiy strateg sifatida his qilishni istasa, marhamat, bugun u yerda odamlar juda zarur, dedi Xinshteyn.
Rossiya prezidenti Vladimir Putin Davlat dumasi deputati Xinshteynni 5-dekabr kuni Kursk viloyati gubernatori lavozimiga tayinladi. Viloyat rahbarining o‘zgarishi Ukraina armiyasining bostirib kirishidan keyin yuzaga kelgan boshqaruvdagi “xaos” tufayli amalga oshgan.
Ukraina armiyasining Kurskka hujumi
Kursk viloyatining bir qismi hozirda Ukraina armiyasi nazoratida. 6-avgust kuni Ukraina qo‘shinlari viloyatga hujum boshladi va janglarning birinchi haftasida 1300 kvadrat kilometrlik hudud, 100 ga yaqin aholi punktlarini egalladi. Sentyabr oyidan beri Rossiya qo‘shinlari Ukraina armiyasini siqib chiqarishga faol harakat qilmoqda. Noyabr oyi oxiriga kelib Ukraina o‘z nazorati ostidagi hududning qariyb 40 foizini yo‘qotdi. Ukraina harbiylariga ko‘ra, ularga yanvar oyi oxirigacha, ya’ni AQSH hokimiyatga saylangan prezident Donald Tramp kelguncha egallab turgan pozitsiyalarini saqlab turish buyurilgan.
Izoh (0)