Ukraina prezidenti Vladimir Zelenskiy Germaniyada Ukrainaning g‘arbiy ittifoqchilari bilan bo‘lgan uchrashuv Kiyevga Rossiyaga qarshi kurashishda yordam berish uchun qo‘shimcha 2 milliard dollar miqdorida harbiy yordam ko‘rsatish va’dalari bilan yakunlanganini ma’lum qildi.
Joriy yilning 9-yanvar kuni bo‘lib o‘tgan uchrashuvdan so‘ng “Mi-Ukraina” telekanaliga bergan intervyusida Zelenskiy ko‘rsatilgan yordam tafsilotlarini ochiqlamagan, biroq 34 oydan buyon davom etayotgan urushning turli jihatlarida 34 ta mamlakat qo‘llab-quvvatlashga va’da berganini ta’kidladi.
“Biz juda samarali uchrashuv o‘tkazdik, juda yaxshi natijalarga erishdik. Ukrainaga 2 milliard dollarlik qo‘shimcha yordam paketlari e’lon qilindi”, dedi u.
Yordam havo hujumidan mudofaa vositalari, axborot texnologiyalari, minalardan tozalash, harbiy-dengiz kuchlari, aviatsiya va artilleriyani o‘z ichiga oladi.
“Va bularning barchasi Ukrainani kuchaytiradi”, deb ta’kidladi Ukraina yetakchisi.
Prezident bu va’dalarni aynan qaysi davlatlar berganini aniqlashtirmagan.
Avvalroq AQSH davlat kotibi Entoni Blinken Vashington Ukrainaga 500 million dollar miqdorida qo‘shimcha harbiy yordam, jumladan, havo hujumidan mudofaa tizimlari uchun raketalar, aviatsiya o‘q-dorilari va F-16 qiruvchi samolyotlarini qo‘llab-quvvatlash uchun uskunalar taqdim etishini ma’lum qilgan edi.
Zelenskiy “Ramshteyn”dagi uchrashuvda ishtirok etdi, so‘ngra Rimda Italiya bosh vaziri Jorja Meloni bilan uchrashdi. Uning aytishicha, u yerda Rossiya hujumlariga qarshi turishda Ukraina havo mudofaa tizimlarini modernizatsiya qilish masalalari, shuningdek, urushni hal qilishning keyingi bosqichlari bo‘yicha yagona pozitsiyani ishlab chiqish bo‘yicha sa’y-harakatlar muhokama qilingan.
Telegraf nashri avvalroq Ukraina prezidenti ikkinchi muddatga o‘z nomzodini qo‘yishga qaror qilgani haqida xabar bergandi.
Hozirda Zelenskiy nomzodini ilgari surishi borasida ochiq ma’lumot bermagan. Prezidentning asosiy raqibi Buyuk Britaniyada elchi bo‘lib ishlayotgan Ukraina armiyasi sobiq bosh qo‘mondoni Valeriy Zalujniy bo‘lishi mumkin.
“U nomzodini ilgari surmasa, prezidentlik saylovlarida Zelenskiy g‘alaba qozonish imkoniyatiga ega. Turli siyosiy kuchlar, jumladan, “Batkivshina” yetakchisi, sobiq bosh vazir Yuliy Timoshenko, sobiq prezident Pyotr Poroshenko va hatto amaldagi prezident ham saylovoldi kurashida Zalujniy nomidan foydalanishga urinmoqda”, deyiladi xabarda.
Ta’kidlanishicha, prezident idorasi rahbari Andrey Yermak Zalujniyga agar u saylovda o‘z nomzodini ko‘rsatmasa, Zelenskiy tomonida ishtirok etsa, “Xalq xizmatchisi” partiyasi ro‘yxatida birinchi o‘rinni va Oliy Rada spikeri o‘rnini olishi mumkinligini aytgan.
Izoh (0)