Rajab Toyyib Erdo‘g‘on kurd guruhlaridan keladigan tahdidni bartaraf etish uchun Turkiya Suriya shimolidagi vaziyatga to‘g‘ridan to‘g‘ri aralashishi mumkinligini aytdi. Bu haqida Associated Press (AP) xabar berdi.
“Biz Suriyada faoliyat yuritayotgan terrorchilik tashkilotlarini zararsizlantirish vaqti keldi deb hisoblaymiz. Buni chegaralarimiz janubidan kelayotgan tahdidlarning oldini olish uchun qilamiz”, dedi Erdo‘g‘on.
Uning so‘zlariga ko‘ra, Suriya bilan chegarani qo‘riqlash Kurdiston Ishchilar partiyasi yangi jangchilarni yollashining oldini olishga ham yordam beradi.
1-dekabr kuni Turkiya tomonidan qo‘llab-quvvatlanayotgan Suriya milliy armiyasi jangari guruhi Suriya shimolida xavfsizlikni tiklashni maqsad qilgan “Ozodlik tongi” operatsiyasini boshladi. Xususan, Suriya milliy armiyasi Kurdiston Ishchilar partiyasi va Suriya kurdlarining mudofaa kuchlari bo‘linmalarini Halab shimolidagi Tell-Rifat shahridan haydab chiqardi.
Kurdiston Ishchilar partiyasi Turkiya, AQSH va Yevropa ittifoqi tomonidan terrorchi tashkilot sifatida tan olingan.
8-dekabr kuni prezident Bashar Asad Suriyani tark etdi va hokimiyat qurolli muxolifat qo‘liga o‘tdi.
Suriyada hokimiyat tepasiga kelgan Abu Muhammad al-Juloniy mamlakat urushdan charchagani, qo‘shnilari yoki G‘arb uchun hech qanday xavf tug‘dirmasligini maʼlum qildi.
Shu sababli u “Hayat Tahrir ash-Sham” guruhini terroristik tashkilotlar ro‘yxatidan chiqarishga chaqirdi. Bu ro‘yxatga guruhni BMT, AQSH, Yevropa ittifoqi, Buyuk Britaniya, Rossiya va boshqa ko‘plab mamlakatlar kiritgan.
Izoh (0)