Туркия қуролли кучлари Сурияда Курдистон ишчи партияси (КИП) жангариларига қарши эҳтимолий операция туфайли жанговар ҳолатга келтирилди. Бу ҳақда Тurkiye хабар берди.
Суриянинг янги раҳбариятидан террорчи ташкилотга қарши зарур чоралар кўришни талаб қилган Анқара ҳар қандай сценарийларга тайёргарликни давом эттирмоқда. Чегарадаги қўшинлар эҳтимолий операция учун жанговар шай ҳолатга келтирилди, дейилади хабарда.
Таъкидланишича, Анқара ҳам Сурияда, ҳам Ироқда Курдистон ишчи партиясини йўқ қилиш устида фаол ишламоқда. Башар Асад режими ағдарилгандан сўнг, Туркия Сурияни турли соҳаларда — инфратузилмани тиклашдан тортиб соғлиқни сақлашгача қўллаб-қувватлашга тайёрлигини билдирди. Айни пайтда жангариларни йўқ қилиш чоралари кўрилмоқда.
Шунингдек, Туркия Суриянинг ўтиш ҳукумати раҳбари Аҳмад ал-Шараа (ал-Жулоний) билан бир нечта учрашувлар ўтказди ва талабларини билдирди:
- Сурия фуқароси бўлмаган террорчилар, жумладан, Туркия, Эрон, Ироқ ва Европадан келган террорчилар мамлакатни тарк этиши керак
- КИПнинг барча раҳбарлари, шу жумладан сурияликлар ҳам Сурияни тарк этиши лозим. Гуруҳнинг суриялик аъзолари қуролларини ташлаши шарт, уларнинг кейинги тақдири Сурия ҳукумати томонидан ҳал қилинади.
Туркия ташқи ишлар вазири Хоқон Фидан эса Суриядаги КИП жангариларига ультиматум қўйилганини айтди.
Биз ҳамма нарсани тинч йўл билан ҳал қилишни хоҳлардик, лекин агар бу амалга ошмаса, ҳарбий операция бўлади, деди у.
Сурияда Асад режими қулаши
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
иёсатчи мамлакатни тарк этганидан кейин исёнчилар Асад қароргоҳига бостириб кирди, одамлар буюмларни талон-торож қилди. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланди.
Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди.
10 декабрь куни Идлиб шаҳрида исёнчиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлади. У фуқароларга қарата қилган мурожаатида бу лавозимни камида 2025 йил 1 мартгача эгаллаб туришини айтди.
Изоҳ (0)