Qozog‘iston prezidenti Qosim-Jo‘mart To‘qayev respublikaning atom energetikasi rivojlangan davlatga aylanishi uchun rasmiylar bir nechta atom elektr stansiyalarini qurish bo‘yicha ishlarni tezlashtirishi kerakligini aytdi.
“Biz atom elektr stansiyalari qurilishini tezlashtirishimiz kerak. Biz ikkita yirik stansiya quramiz, ehtimol, uchta. Biz Qozog‘istonni yadro energetikasi rivojlangan, sun’iy intellektdan faol foydalaniladigan va to‘liq raqamlashtirilgan davlatga aylantirishimiz kerak”, dedi To‘qayev.
Avvalroq To‘qayev “Ana tili” gazetasiga bergan intervyusida Qozog‘istonga yuqori quvvatli atom elektr stansiyasi kerakligini aytgan edi. U yaqin kelajakda ular respublikada ikkinchi, ehtimol uchinchi atom elektr stansiyasini qurishga kirishishlarini inkor etmadi.
Qozog‘istonda 2024-yil 6-oktyabrda atom elektr stansiyasini qurish imkoniyati bo‘yicha referendum o‘tkazildi. Respublikada stansiya qurilishini saylovchilarning 71,12 foizi qo‘llab-quvvatladi.
Izoh (0)