Qozog‘iston hukumati mamlakatda atom elektr stansiyasini qurish masalasi bo‘yicha umumxalq referendumini o‘tkazish to‘g‘risida qaror qabul qildi. Jamoatchilik muhokamalarida faollar ekologik vaziyatning yomonlashuvi xavfi tufayli AES qurilishiga qarshi chiqdi.
Qaror hukumatga Qozog‘iston energetika vaziri Almasadam Satkaliev tomonidan taqdim etildi. Bosh vazir Oljas Bektenov qaror loyihasini prezident administratsiyasiga kiritish bo‘yicha topshiriq berdi.
Prezident Qosim-Jo‘mart To‘qayev 2023-yil sentyabr oyida AES qurilishi bo‘yicha referendum o‘tkazishni taklif etgandi. U bir tomondan, Qozog‘iston dunyodagi eng yirik uran ishlab chiqaruvchisi sifatida “o‘z atom energiya ishlab chiqarishiga ega bo‘lishi lozim”ligini aytgan. Boshqa tomondan, “Semipalatinsk yadro poligonining fojiali merosi”ni inobatga olgan holda, referendumni zarur deb hisoblagan.
Qozog‘istonda referendum e’lon qilinishidan oldin AES qurish bo‘yicha jamoatchilik muhokamasi bo‘lib o‘tgan. Unda ekologlar va faollar radioaktiv chiqindilarni noto‘g‘ri utilizatsiya qilish bilan bog‘liq xavflar tufayli loyihani amalga oshirishga qarshi chiqqan.
Izoh (0)