Ijtimoiy tarmoqlarda Respublika pediatriya markazi bemor bolalar bilan to‘lgani, ularning bir qismi yangi virusga chalingani aytilgan xabarlar tarqaldi. Sog‘liqni saqlash vazirligi bunga munosabat bildirdi.
“Avvalo, aytish joizki, ijtimoiy tarmoqlarda tarqalgan xabarlardagi bolalarning metapnevmovirusga chalingani xususidagi ma’lumotlar mutlaqo asossiz”, deyiladi vazirlik munosabatida.
Ma’lum qilinishicha, Yangi yil arafasida Respublika ixtisoslashtirilgan pediatriya ilmiy-amaliy tibbiyot markazining jami beshta — Chaqaloqlarni parvarish qilish, Chaqaloqlar patologiyasi va reanimatsiyasi, Gepatologiya, Nefrologiya hamda Umumiy pediatriya bo‘limlarida profilaktik yuvish-tozalash va zararsizlantirish ishlari amalga oshirilgan.
Mazkur bo‘limlarning barchasi 6-yanvar kunidan qayta ochildi va bu holat tabiiy ravishda bemorlar oqimi nisbatan ortishiga sabab bo‘ldi.
“Qolaversa, markaz ijtimoiy tarmoqlardagi xabarlarda qayd etilgan yuqumli kasalliklarga chalingan bemorlarni qabul qilish va davolashga ixtisoslashtirilmagan”, deyiladi xabarda.
Sog‘liqni saqlash vazirligi ijtimoiy tarmoq foydalanuvchilaridan turli asossiz va tekshirilmagan xabarlar tarqatmaslikni so‘radi.
Metapnevmovirus haqida
Ijtimoiy tarmoqlarda metapnevmovirus infeksiyasi va ushbu infeksiyaning COVID-19 dan ham xavfli ekanligi haqida xabarlar tarqalmoqda. Aslida virus yangi emas, birinchi marta 2001-yilda aniqlangan, lekin Xitoyning shimolida, ayniqsa, 14 yoshdan kichik bolalar orasida kasallanish holatlari ko‘paygani tufayli e’tiborni tortdi.
O‘zbekistonda ham bu virus qayd etilgan. Qo‘shni davlarlardan Qozog‘iston, Qirg‘izistonda metapnevmovirus aniqlandi.
Sanepidqo‘mita ma’lumotiga ko‘ra, ayni vaqtda O‘zbekistonda o‘tkir respirator infeksiyalarga chalinish holatlarining mavsumiy ko‘tarilishi kuzatilmoqda. Ushbu respirator infeksiyalarning so‘nggi laborator tahlillari natijasiga ko‘ra, 36,9 foizida gripp virusi, 30,2 foizida rinovirus, 28,6 foizida respirator-sinsitial virus, 1,2 foizida metapnevmovirus va 3,1 foizida boshqa viruslar aniqlangan.
Qo‘mita bu infeksiyalarni yuqtirib olmaslik uchun profilaktika va gigiyena qoidalariga rioya qilish, odamlar gavjum joylarga, ayniqsa yosh bolalarni olib yurishni cheklash, kasallik belgilari paydo bo‘lgan oila a’zolarini alohida saqlab, shifokor ko‘rsatmasiga asosan davolanishni tavsiya qildi.
Sog‘liqni saqlash vazirligi metapnevmovirus yangi kasallik emasligini, ortiqcha xavotirga hojat yo‘qligini bildirdi. Vazirlik axborotiga ko‘ra, kasallikni davolash odatda simptomatik bo‘lib, asosan uy sharoitida bemorning ahvolini yengillashtirishga qaratilgan muolajalar qo‘llaniladi. Og‘ir holatlarda kislorodli terapiya yoki kasalxonaga yotqizish talab qilinishi mumkin.
Izoh (0)