Rossiya Mongoliyada atom elektr stansiyasini quradi. “Rosatom” rahbari Aleksey Lixachev loyiha detallari muhokama qilinayotganini aytdi. Bu haqda “RIA Novosti” xabar berdi.
Atom elektr stansiyasini Yangi Xarxorum hududida qurish rejalashtirilgan.
“Mongoliya uchun kichik AES loyihasining texnik ko‘rinishi amalda tasdiqlandi”, deydi Aleksey Lixachev.
Stansiya dastlab Rossiya tashkiloti tomonidan ekspluatatsiya qilinishi ko‘rib chiqilmoqda.
Bahorda Sochidagi “Atomekspo” forumida Mongoliyada kichik modulli atom elektr stansiyasini qurish bo‘yicha yo‘l xaritasi imzolandi. Aynan 220 dan 330 megavattgacha bo‘lgan quvvat Mongoliyaning yangi poytaxti Yangi Xarxorum uchun zarur, deya ta’kidladi “Rosatom” rahbari.
U 2-sentyabr kuni “Monatom”, Energetika vazirligi va Mongoliya Xavfsizlik kengashi bilan ko‘p bosqichli muzokaralar o‘tkazilganini ma’lum qildi. Hozirda kadrlar masalasi kun tartibida turibdi.
Biz buni juda batafsil muhokama qildik, mongoliyalik do‘stlarimiz, albatta, birinchi bosqichda ushbu stansiyani boshqaruvchi tashkilot hatto Rossiya tashkiloti bo‘lishi mumkinligini ko‘rib chiqmoqda, deya tushuntirdi Lixachev.
Hozirda Qozog‘istonda ham AES qurilishi masalasi hal qilinmoqda. Respublika prezidenti Qosim-Jo‘mart To‘qayev xalqqa qilgan murojaatnomasida Qozog‘istonda AES bo‘yicha referendum 6-oktyabrda o‘tkazilishini aytdi. Stansiyani qurishda ishtirok etishi mumkin bo‘lgan kompaniyalar orasida Qozog‘iston hukumati “Rosatom”, KHNP (Janubiy Koreya), EDF (Fransiya) va China National Nuclear Corporation’ni (Xitoy) tanlagan.
Rossiya O‘zbekistonda AES quradi
Rossiya prezidenti Vladimir Putinning O‘zbekistonga davlat tashrifi doirasida 27-may Jizzaxda atom elektr stansiyasi qurishdagi hamkorlikka oid hukumatlararo bitimga o‘zgartirish kiritish to‘g‘risidagi bayonnoma imzolandi. Shu kuni “O‘zatom” agentligi huzuridagi “AES qurilishi direksiyasi” DUK va “Rosatom” tuzilmasidagi “Atomstroyeksport” AJ injiniring kompaniyasi o‘rtasida O‘zbekistonda kam quvvatli atom elektr stansiyasi qurilishi bo‘yicha shartnoma tuzildi.
Imzolangan kelishuvlarga asosan, Jizzax viloyatida Rossiya loyihasi asosida 330 MVt quvvatga ega (har biri 55 MVt quvvatli 6 ta reaktordan iborat) AES quriladi. Stansiya qurilishida “Rosatom” bosh pudratchi bo‘ladi, O‘zbekiston kompaniyalari ham ishtirok etadi.
Izoh (0)