Qozog‘istonning Oqmo‘la viloyati Ostona—Shuchinskiy trassada noqulay ob-havo tufayli 40 ga yaqin avtomobil to‘qnashdi. Bu haqda Tengrinews xabar berdi.
Viloyat IIBga ko‘ra, hodisa soat 13:30 larda Birjansal tumanining Ko‘gam va Qaratal qishlog‘i o‘rtasida yuz bergan. Ob-havo sharoiti yomonlashgani (bo‘ron, ko‘rish cheklangani) sababli 40 ga yaqin avtomashina to‘qnashgan. Jabrlanganlar va qurbonlar haqida hozircha ma’lumot yo‘q.
Voqea joyida politsiya va favqulodda vaziyatlar xizmati xodimlari ishlamoqda. Avtomobillarni evakuatsiya qilish va yo‘l harakati xavfsizligini ta’minlash ishlari olib borilmoqda.
Avvalroq favqulodda xizmatlar hududda ob-havo sharoiti yomonlashishi mumkinligi haqida ogohlantirgan. Shu munosabat bilan barcha haydovchilarga, ayniqsa, shahar tashqarisidagi avtomobil yo‘llarida harakatlanmaslik tavsiya etilgan.
Haydovchilarni ob-havo sharoitlarini inobatga olishga, yo‘llarda o‘ta ehtiyotkor bo‘lishga va vaziyat yaxshilanmaguncha ushbu yo‘nalishda harakatlanmaslikka chaqiramiz, deyiladi IIB xabarida.
Izoh (0)