Qozog‘iston hukumati 6-oktyabr kuni bo‘lib o‘tadigan referendumda atom elektr stansiyasini (AES) qurish bo‘yicha ijobiy qaror qabul qilingan taqdirda, AESda mahalliy kadrlar ishlashini kutmoqda. Bu haqda Qozog‘iston energetika vaziri Almasadam Satkaliyev ma’lum qildi.
“Ishonchimiz komilki, zarur malakaga hamda turli mamlakatlardagi AESlarda tajribaga ega bo‘lib aynan qozog‘istonlik mutaxassislar yuqori darajada ishlay oladi. Qurilishni amalga oshiradigan potensial vendorni tanlashda biz, albatta, mahalliy mutaxassislarni to‘liq tayyorlash, ilmiy-amaliy bazani rivojlantirish, ijtimoiy investitsiyalar uchun zarur shart-sharoitlarni yaratishga qaratamiz” dedi Satkaliyev.
Uning qayd etishicha, Atom energiyasi bo‘yicha xalqaro agentlik allaqachon qozog‘istonlik mutaxassislar bilan hamkorlik qilish istagini bildirgan.
Vazirning so‘zlariga ko‘ra, Qozog‘istonda yadro reaktorlari bilan ishlash tajribasiga ega kadrlar mavjud. U mamlakatda yadro markazi mutaxassislari, Yadro fizikasi instituti mutaxassislari borligini, ikki mingga yaqin odamlar eng keng va ilmiy vakolatlarga ega ekanini qo‘shimcha qilgan.
Vazir, shuningdek, atom elektr stansiyasi qurilsa, qat’iy moliyaviy nazorat saqlanishini ta’kidlab, MAGATEning muntazam missiyalari asosida xalqaro monitoring amalga oshirilishini qayd etgan.
Qozog‘iston prezidenti Qosim-Jo‘mart To‘qayev 2-sentyabr kuni mamlakatda AES qurish bo‘yicha 6-oktyabr kuni referendum o‘tkazish to‘g‘risidagi farmonni imzolagan edi. Referendumni tashkil etish va o‘tkazish Markaziy saylov komissiyasiga yuklatilgan.
Qozog‘iston Energetika vazirligining ma’lum qilishicha, tadqiqot natijalariga ko‘ra, Olmaota viloyati, Jambil tumani, Ulken qishlog‘i hududi stansiya qurish uchun eng maqbul hudud deb topilgan. Qozog‘iston hukumati yadro texnologiyalarining bir nechta potensial yetkazib beruvchilari – Xitoyning CNNC kompaniyasi, Janubiy Koreyaning KHNP, Rosatom va Fransiyaning EDF kompaniyalarini ko‘rib chiqmoqda.
Izoh (0)