Qozog‘istonda atom elektr stansiyasi (AES) qurilishiga sarflanadigan kapital xarajatlar 10 milliard dollardan 15 milliard dollargacha bo‘lishi mumkin. Bu haqda “Qozog‘iston atom elektr stansiyalari” bosh direktori Timur Jantikin xabar berdi.
![](/static/2024/08/28/photo_2024-08-28_14-34-57-kLXy38Is.jpg)
Hozircha narx haqida aniq ayta olmaymiz, chunki loyiha yo‘q. Ammo bizda overnight cost ma’lumotlari bor. Bu kapital xarajatlar... Ular bo‘yicha biz qurilish qiymati 10 milliard dollardan 15 milliard dollargacha bo‘lgan diapazonni ko‘rsatuvchi moliyaviy-iqtisodiy modellarni yaratmoqdamiz”, dedi u.
Jantikinning so‘zlariga ko‘ra, loyiha tijoriy bo‘ladi.
Biz byudjetdan mablag‘ jalb qilish imkoniyatini ko‘rib chiqmayapmiz, barcha hisob-kitoblar tijorat asosida amalga oshirilmoqda. Tabiiyki, bu qo‘shimcha xarajatlarni keltirib chiqaradi, chunki tijorat har doim qimmatroq... Belarus Rossiya bilan hukumatlararo kelishuv asosida qurilish olib borgan, Rossiya byudjeti qurilishni 10 milliard dollargacha moliyalashtirgan. Aslida stansiya taxminan 7 milliard dollarga tushgan”, dedi u.
Energetika vaziri Almasadam Satkaliyevning tushuntirishicha, AESdan olinadigan elektr energiyasi narxi mamlakatimiz yuqori iste’mol vaqtida sotib olishga majbur bo‘ladigan quvvatlar narxidan past bo‘ladi. U AESni 8-10 yil ichida qurish rejalashtirilganini eslatdi. Shu bilan birga, 2035-yilga kelib mamlakat energetika balansida ko‘mirning ulushi hozirgi 70 foiz ko‘rsatkichdan 30 foizdan kamroqqa tushishi kutilmoqda.
Qozog‘istonda AES qurilishi bo‘yicha referendum o‘tkaziladi
Prezident Qosim-Jo‘mart To‘qayev 2023-yil sentyabrda AES qurilishi bo‘yicha referendum o‘tkazishni taklif qilgandi. U bir tomondan, Qozog‘iston dunyodagi eng yirik uran ishlab chiqaruvchisi sifatida “o‘z atom energiya ishlab chiqarishiga ega bo‘lishi lozim”ligini aytgan. Boshqa tomondan, “Semipalatinsk yadro poligonining fojiali merosi”ni inobatga olgan holda, referendumni zarur deb hisoblagan.
Qozog‘istonda referendum e’lon qilinishidan oldin AES qurish bo‘yicha jamoatchilik muhokamasi bo‘lib o‘tgan. Unda ekologlar va faollar radioaktiv chiqindilarni noto‘g‘ri utilizatsiya qilish bilan bog‘liq xavflar tufayli loyihani amalga oshirishga qarshi chiqqan.
Izoh (0)