AQSH Xitoy bilan yuzaga kelishi mumkin bo‘lgan konfliktga faol tayyorgarlik ko‘rmoqda. Bu haqda Wall Street Journal (WSJ) xabar berdi.
May oyida AQSH va Filippin dengiz piyoda qo‘shinlari Tayvan yaqinidagi kichik orollarda harbiy mashg‘ulotlar o‘tkazdi. Mashg‘ulotlar “Chinulk” vertolyotlaridan dengiz piyoda guruhlarini joylashtirish va konflikt yuzaga kelgan taqdirda foydalanilishi mumkin bo‘lgan yerlarni o‘rganishni o‘z ichiga oladi.
“O‘tgan yili AQSH qo‘shinlari Filippinning bir nechta harbiy bazalaridan foydalanish imkoniga ega bo‘ldi va mashg‘ulotlar ularning shimolida, Tayvandan bir soatcha yo‘ldagi bir qator orollarda bo‘lib o‘tdi”, — deyiladi xabarda.
Ta’kidlanishicha, AQSH dengiz piyodalarining vazifasi Tayvanda urush boshlangan taqdirda, boshqa AQSH qurolli kuchlari yordamga kelishi uchun Xitoyning hujumini sekinlashtirish bo‘ladi.
“Dengiz piyodalarining kichik, yashirin guruhini frontga joylashtirish, urush sodir bo‘lgan taqdirda, taktik asos vazifasini o‘taydi”, — dedi Strategik va xalqaro tadqiqotlar markazining katta ilmiy xodimi Benjamin Jensen.
Biroq “borish qiyin, uzoq joylardagi” mashqlar ko‘plab muammolarni ochib berdi. Ba’zi orollarda uchish-qo‘nish yo‘laklari mavjud bo‘lsa-da, boshqalarida faqat kichik vertolyot maydonchalari bor. Chekka hududlarda esa har doim ham radar tizimlarini harakatlantirish uchun keng yo‘llar mavjud emas.
Eng katta muammo shundaki, harbiylarning dengiz qo‘shinlari va ularning jihozlarini orollar orasida tashish uchun kichik kemalari yo‘q.
“Bunday kemalarni ishlab chiqarish rejalari qoldirilgan va ularni qurish hali boshlanmagan”, — deyiladi xabarda.
O‘z navbatida, vertolyotlar kamroq yuk tashish imkoniyatiga ega. WSJning qo‘shimcha qilishicha, Xitoyning “raketa arsenali” va “har qanday shakl va o‘lchamdagi dronlari” ham xavotir uyg‘otadi.
Izoh (0)