O‘tgan sutka davomida Xitoy Xalq ozodlik armiyasining 57 ta samolyoti va to‘rtta kemasi Tayvanga tutash hududga kirib keldi. Bu haqda Tayvan Mudofaa vazirligi bayonotiga tayanib “RBK” xabar berdi.
“8-yanvar kuni ertalab soat 6:00 dan 9-yanvar kuni ertalabki soat 6:00 ga qadar Tayvan atrofida Xitoy Xalq ozodlik armiyasining 57 ta samolyoti va to‘rtta kemasi qayd etildi”, — deyiladi xabarda.
Tayvan havo hujumidan mudofaa tizimlarining identifikatsiya zonasiga 28 ta samolyot, jumladan uchta BZK-005 dronlari, oltita J-11 qiruvchisi, ikkita Su-30, 12 ta J-16 qiruvchisi va ikkita J-10, ikkita H-6 strategik bombardimonchi samolyotlari, shuningdek, KJ-500 radiolokatsion erta ogohlantirish va boshqarish samolyoti kirgan.
Ularni kuzatish uchun havo va dengiz patrullari yuborildi. Bundan tashqari, harbiylar yerga asoslangan raketa tizimlarini joylashtirdi, deb qo‘shimcha qiladi Tayvan Mudofaa vazirligi.
1949-yilda Xitoy respublikasi ma’muriyati va hukmron Gomindan partiyasi vakillari fuqarolar urushida mag‘lubiyatga uchraganidan so‘ng Tayvanga evakuatsiya qilingan. Ular XXRdagi yangi kommunistik hukumatni qonuniy deb tan olmadi. Pekin esa Tayvan suverenitetini tan olmadi. Xitoy hukumati orolni mamlakat provinsiyalaridan biri deb biladi.
AQSH Tayvanga mudofaa yordami ko‘rsatib, orolga qurol-yarog‘ yetkazib beradi. Prezident Jo Bayden, agar Xitoy Tayvanga qarshi kuch ishlatishga qaror qilsa, Vashington harbiy javob berishga tayyorligini ta’kidlagan. Shu bilan birga, AQSH “yagona Xitoy” siyosatiga amal qilishda davom etmoqda, degandi u. Xitoy hukumati, o‘z navbatida, Tayvanni kuch bilan o‘ziga qo‘shib olishni istisno qilmagan.
Izoh (0)