Tayvanning havo mudofaa zonasiga Xitoy armiyasining 39 ta jangovar samolyoti kirdi. Bu haqda Reuters xabar berdi.
22-dekabr kuni orol davlatning havo mudofaa zonasiga 21 ta qiruvchi, to‘rtta H-6 bombardimonchi, bitta yonilg‘i quyish va suvosti kemalariga qarshi samolyot va dronlari kirgan. Aviatexnikaning katta qismi qirg‘oqning janubi-sharqiy qismidagi Bashi kanalini kesib o‘tgan. Shuningdek, orol yaqinida Xitoy flotining uchta harbiy kemasi qayd etilgan.
Tayvan havo mudofaa tizimlari Xitoy samolyotlarining harakatini kuzatgan. Tayvan qiruvchi samolyotlari havoga ko‘tarilgan. Orol davlatining bunday harakati standart protsedura hisoblanadi, chunki havo mudofaasini tan olish zonasiga kirish muntazam ravishda amalga oshirib kelinmoqda.
So‘nggi ikki yil ichida Xitoy tobora ko‘proq Tayvanning havo zonasiga kirmoqda. Bu holat 2021-yil kuz-qish oylarida keskin oshgan. Xitoy rasmiylari orolni kuch bilan qaytarishga tayyor ekanini ochiq aytmoqda.
Xitoy yetakchisi Si Szinpin noyabr oyida bo‘lib o‘tgan G20 sammitida AQSH prezidenti Jo Bayden bilan uchrashgandi. Si Szinpin Tayvan masalasini Xitoy—AQSH munosabatlaridagi asosiy qizil chiziq deb atagandi. Dekabr oyida AQSH Tayvanga harbiy yordam uchun 10 mlrd dollar ajratishga tayyorligi ma’lum qilingan. Shu bilan birga, AQSH Tayvanga yanada takomillashtirilgan Patriot raketalarini yetkazib berishni taklif qilgan.
Izoh (0)