АҚШ Савдо вазирлиги миллий хавфсизлик нуқтаи назаридан Хитой дронларини АҚШда чеклаш ёки тақиқлашга олиб келиши мумкин бўлган янги қоидаларни кўриб чиқаётганини маълум қилди.
Вазирлик маълумотига кўра, Хитой ва Россия таҳдидлари “рақибларга ушбу қурилмаларга масофадан кириш ва манипуляция қилиш имкониятини бериши мумкин, бу эса АҚШнинг махфий маълумотларини хавф остига қўяди”.
АҚШда сотиладиган тижорат дронларининг аксарияти Хитойда ишлаб чиқарилган.
2024 йилнинг сентябрь ойида АҚШ савдо вазири Жина Раймондо вазирлик аввалроқ таклиф қилинган Хитой транспорт воситаларини АҚШда амалда тақиқлашга ўхшаш чекловлар киритиши мумкинлигини айтган эди. Бунда асосий эътибор Хитой ва Россия ускуналари, чиплари ва дастурий таъминотига эга дронларга қаратилади.
Раймондо 20 январга қадар Хитой автомобилларига нисбатан қоидаларни ишлаб чиқиш якунланишига умид билдирган. Хитой дронларини чеклаш ёки тақиқлаш тўғрисидаги қарорни 20 январь куни лавозимга киришаётган бўлажак президент Дональд Трамп маъмурияти қабул қилади. Сўнгги бир йил ичида АҚШ Хитой дронларига қарши бир қатор чоралар кўрди. Хусусан, Жо Байден декабрь ойида Хитойнинг DJI ва Autel Robotics компаниялари томонидан ишлаб чиқарилган янги дрон моделларини сотишни тақиқловчи қонунни имзолаган.
DJI дунёдаги энг йирик дрон ишлаб чиқарувчиси бўлиб, АҚШдаги барча тижорат дронлари савдосининг ярмидан кўпи унинг ҳиссасига тўғри келади.
Сентябрь ойида Вакиллар палатаси АҚШда янги DJI дронларини ишлатишни тақиқлаш учун овоз берган.
Октябрь ойида DJI Мудофаа вазирлигини Пекин ҳарбийлари билан ҳамкорлик қилаётгани тахмин қилинаётган компаниялар рўйхатига киритгани учун судга берди ва бу тахминлар нотўғри эканлигини ҳамда компанияга молиявий зарар етказганини айтди.
Америка қонунчилари бир неча бор DJI дронлари маълумотларни узатиш, кузатиш ва миллий хавфсизликка таҳдид солиши мумкинлигидан хавотир билдиришган, бу эса компания томонидан рад этилган. 2019 йилда Конгресс Пентагонга Хитойда ишлаб чиқарилган дронлар ва бутловчи қисмларни сотиб олиш ёки улардан фойдаланишни тақиқлаган.
Изоҳ (0)