“Daryo” nashri 9-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Muhokamalarga sabab bo‘lgan Eron kamikadze dronlari endi Rossiyaning o‘zida ishlab chiqariladimi?
Rossiya o‘z armiyasi tomonidan Ukrainada faol qo‘llanilayotgan Eron kamikadze-dronlarini ishlab chiqarishni boshlamoqchi. Bu haqda Ukraina Milliy xavfsizlik va mudofaa kengashi kotibi Aleksey Danilov ma’lum qildi.
“Ular bu ishni amalga oshirmoqchi bo‘layotgan shaharlardan biri — Tolyatti, boshqa shaharlar ham bor. Shu bilan birga, Rossiya zarur tarkibiy qismlar tanqisligi sharoitida dronlarini nimadan yig‘ishi katta savol bo‘lib turibdi”, — deya qo‘shimcha qilgan kotib.
Rossiyaning o‘z hududida Eron dronlarini ishlab chiqishni yo‘lga qo‘yish rejalari haqida avvalroq The Washington Post gazetasi xabar bergandi. Nashr ma’lumotlariga ko‘ra, Rossiya va Eron rasmiy shaxslari ishlab chiqarish bo‘yicha 2022-yil noyabrida kelishuvga erishgan.
2023-yil yanvarida CNN telekanali Shahed-136 ning 52 ta detalidan 40 tasi Amerikaning 13 xil kompaniyasi tomonidan tayyorlanganini ma’lum qilgandi. Qolgan 12 ta detal Kanada, Shveysariya, Yaponiya, Tayvan va Xitoyda ishlab chiqarilgan.
Yevropa davlatlarining Rossiya-Ukraina mojarosiga nisbatan o‘zgarib borayotgan pozitsiyalari
AQSH hukumati Ukrainaga qurol-yarog‘larni ulardan Rossiya hududlariga zarbalar berishda foydalanmaslik sharti bilan yetkazib berishda davom etmoqda. Bu haqda amerikalik sharhlovchi Andreas Klut Bloomberg uchun yozgan maqolasida aytib o‘tdi.
Sharhlovchining fikricha, AQSH Rossiyaga zarbalar berilishiga imkoniyat yaratish orqali “qizil chiziq”ni bosib o‘tishni istamaydi, chunki bu Rossiya hukumatini yadro qurolidan foydalanishga gijgijlashi mumkin.
Germaniya Ukrainaga va’da qilgan 40 ta jangovar mashinani armiya zaxirasidan olib bermoqchiAyni jarayonda Fransiyaning Rossiya-Ukraina mojarosiga pozitsiyasi o'zgarmoqda. Dastlab Fransiya prezidenti Moskva va shaxsan Putin bilan muzokaralarni davom ettirishning asosiy tarafdorlaridan biri edi.
Ammo so‘nggi haftalarda Parij siyosati o‘zgarib ketdi. Fransiya Ukrainaga G‘arbda ishlab chiqarilgan tanklarni yetkazib bergan birinchi mamlakatga aylandi.Hozirda Germaniya Ukrainaga va’da qilgan 40 ta jangovar mashinani armiya zaxirasidan olib bermoqchiligini bildirmoqda.
Tobora avj olayotgan Xitoy-Tayvan mojarosida “Ukraina modeli” qo‘l kelmaydi
Agar Xitoy 2026-yilda Tayvanga bostirib kirsa, bu harbiylar orasida minglab qurbonlarga olib keladi, ammo Pekin g‘alaba qozonishi amri mahol. Bu haqda harbiy nizoning katta ko‘lamli simulyatsiyasini amalga oshirgan Strategik va xalqaro tadqiqotlar markazi (CSIS) hisobotida aytiladi, deb yozadi CNN hujjat nusxasiga tayanib. Hisobot “Keyingi urushning birinchi janggi” deb nom oldi.
Ekspertlar ta’kidlashicha, Tayvanga hujum qilingan taqdirda, qurol-yarog‘ yetkazib berish bo‘yicha “ukrain modeli”ni amalga oshirish mumkin bo‘lmaydi. “Urush boshlanganidan keyin Tayvanga qo‘shinlar yoki o‘q-dorilarni yetkazish mumkin bo‘lmaydi, shuning uchun vaziyat Ukrainadagi holatdan tubdan farq qiladi. Tayvanliklar urush olib borishda nimalardan foydalanmoqchi bo‘lsa, urush boshlangan vaqtda ular qo‘l ostida bo‘lishi kerak”, — dedi loyihaning uch rahbaridan biri Mark Kanchian.
Shu bilan birga, markaz Xitoy va Tayvan urushi “muqarrar yoki hatto ehtimoliy” ekanini aytmayapti. “Xitoy hukumati Tayvanga qarshi diplomatik izolyatsiya, bosim yoki iqtisodiy majburlash strategiyasini qabul qilishi mumkin”, — deya aniqlik kiritiladi hisobotda.
Eslatib o‘tamiz, Tayvan ko‘rfazidagi vaziyat 2022-yil avgustida AQSH Kongressi spikeri Nensi Pelosi Xitoy o‘z hududi deb hisoblaydigan Tayvanga tashrif buyurganidan keyin keskinlashgan.Ayni vaziyatda, Tayvan orolga bir sutkada Xitoyning 50 dan ortiq samolyot va kemalari yaqinlashganini ma’lum qildi
O‘zbekistonda sog‘liqni saqlash va farmatsevtika sohasiga qanday o‘zgartirishlar kiritish kerak? Fojiaga sabab bo‘lgan omillar bilan tanishamiz
O‘zbekistonda “Dok-1 Maks” preparatini qabul qilish oqibatida bolalar hayotdan ko‘z yumgani bilan bog‘liq fojia O‘zbekiston sog‘liqni saqlash va farmatsevtika sohasida muammolarni yaqqol ko‘rsatdi. “Yuksalish” umummilliy harakati bunday holatlarning oldini olish borasida bir necha takliflar bilan chiqdi.
Birinchidan, dori vositalarini nazoratsiz qo‘llash amaliyotini to‘liq qayta ko‘rib chiqish zarur, deb hisoblaymiz. Chunki biz qaysi dorini ichish bo‘yicha ko‘pincha shifokor retseptisiz, dorixona sotuvchilari bilan maslahatlashamiz.
Ma’lum qilinishicha, 2008—2018-yillarda O‘zbekistonda dori vositalari bilan o‘zini o‘zi davolash natijasida sog‘liqning yomonlashganligi bilan bog‘liq 2 300 ta holat ro‘yxatga olingan. JSST ma’lumotlariga ko‘ra, dori vositalarini nazoratsiz qo‘llash va o‘zini o‘zi davolash darajasining oshishi aynan reklama bilan bog‘liqdir.
Shuning uchun avvalo, ommaviy axborot vositalarida dorilarning bevosita reklamasiga cheklovlar joriy etish va dori vositalarining reklamasiga oid qonunchilikni buzganlik uchun javobgarlikni kuchaytirish taklif qilindi.
Keyingi masala, dori vositalarini ishlab chiqaruvchilar, import qiluvchilar va sertifikatlash tashkilotlari mas’uliyatini kuchaytirish. Xabar berilganidek, “Dok-1 Maks” va “Ambronol” dorilari, tekshiruvlarda aniqlanishicha, “Dori vositalarini standartlashtirish ilmiy markazi” tomonidan belgilangan tartibda laboratoriya sinovlaridan o‘tkazilmagan. Natijada sifatsiz preparatlarning sotuvga chiqarilishiga yo‘l qo‘yilgan.
Shu maqsadda Jinoyat kodeksining 186-3-moddasi subyektlari qatoriga sifatsiz, qalbakilashtirilgan va xavfsizlik talablariga javob bermaydigan dori vositalarini tarqatishga yo‘l qo‘ygan shaxslarni ham kiritish taklif etilmoqda.
Shuningdek, keng aholi manfaatlariga daxldor bo‘lgan farmatsevtika sanoatiga oid axborotlarni yetkazuvchi ochiq ma’lumotlar bazasini shakllantirish, Sotiladigan barcha turdagi dori-darmonlarni majburiy raqamli markirovkalash jarayonini tezlashtirish ta’kidlandi. Xaridorlar aynan markirovka orqali dorining haqiqiyligini tekshirishi mumkin.
Izoh (0)