AQSH Senatining tashqi aloqalar qo‘mitasi rahbari Robert Menendez Qirg‘iziston prezidenti Sadir Japarovga maktub yo‘llab, Rossiyaga qarshi sanksiyalarga amal qilishga chaqirgandi. Japarov senatorning ushbu chaqirig‘iga javob qaytardi.
Japarov senatorning maktubini Qirg‘izistonga bosim o‘tkazish va o‘z tomoniga og‘dirish sifatida baholashini aytdi.
“Senatorning maktubiga kelsak, menga ko‘plab taniqli siyosatchilardan xatlar keladi. Buni Qirg‘izistonga bosim o‘tkazish va bizni o‘z tomoniga tortish uchun oddiy bahona deb bilaman. Ammo bunga yo‘l qo‘ymaymiz. Biz mustaqil davlatmiz. Barcha davlatlar bilan teng huquqli munosabatlarni davom ettiramiz. Biz ko‘p vektorli tashqi siyosat olib boramiz. Rossiya va Ukraina masalasida biz boshidanoq neytral pozitsiyada ekanimizni bildirdik. Kelajakda ham bu pozitsiyaga amal qilamiz”, — dedi siyosatchi.
Shuningdek, Japarov Qirg‘iziston kompaniyasi tomonidan tashilgan Xitoy dronlari Qozog‘istonda qo‘lga olingani haqidagi ma’lumotga ham ilk bor izoh berdi.
“Rossiya va Xitoy kichik Qirg‘izistonga qaram emas. Bu davlatlar allaqachon qo‘shni. Ular orasida 4000 kilometr umumiy chegara mavjud. Rossiya istasa, dengiz orqali vagonlarda yoki barjalarda xohlagan molini olib kelishi mumkin. Ha, Qozog‘istonda Qirg‘iziston kompaniyasiga tegishli dron ko‘rinishidagi yuk qo‘lga olindi. Kompaniyaning tushuntirishicha, bu dronlar qishloq xo‘jaligi maqsadlari uchun mo‘ljallangan. Ammo shunga qaramay, endi biz dronlarni eksport qilishni taqiqlaymiz”, — dedi u.
Senatorning maktubida nimalar yozilgandi?
Menendez Japarovga yozgan maktubida Qirg‘iziston Rossiyaga sanksiyalardan qochishga yordam berganini yozdi.
“Hukumatingizdan sanksiyalardan bo‘yin tovlash haqidagi jiddiy ayblovlarni zudlik bilan tekshirib ko‘rishni va hududingiz orqali noqonuniy tovarlar oqimining oldini olish uchun yanada mustahkam qadam qo‘yishni so‘rayman”, — deb yozadi u.
Menendez fikricha, Qirg‘iziston Rossiyaga qarshi sanksiyalarni qo‘llab-quvvatlashga qodir emas, degan xavotirlar bor. U bu Qirg‘izistonning demokratiyadan chekinishi va inson huquqlarining keng miqyosda buzilishining alomati ekanini aytgan.
“Bir vaqtlar Markaziy Osiyoda demokratiyaning yorqin nuri bo‘lgan Qirg‘iziston avtokratiya sari xavfli yo‘ldan bormoqda. Sizdan mustaqil ommaviy axborot vositalari va jurnalistlarga qo‘yilgan barcha cheklovlarni olib tashlashni, qamoqdagi inson huquqlari himoyachilarini ozod qilishni so‘rayman”, — deydi senator.
AQSH Qirg‘izistonga qanday sanksiyalar kiritdi?
20-iyul kuni AQSH Qirg‘izistonning to‘rtta shirkatiga Rossiyaga elektron komponentlar va boshqa texnologiyalar eksport qilgani, ularning bir qismi Rossiya mudofaa sektori tomonidan qo‘llanilganini aytib, sanksiyalar kiritdi.
Bunga javoban Qirg‘iziston Milliy xavfsizlik davlat qo‘mitasi “na Qirg‘iziston, na davlat tuzilmalari va kompaniyalari” Rossiyaga sanksiyalangan mahsulotlarni yetkazib bermayotganini, biroq ayni paytda tekshiruv o‘tkazishga va’da berganini bildirdi.
Ukraina ham joriy qilingan sanksiyalarga munosabat bildirdi
Qirg‘iziston elchisi Idris Qodirqulov Ukraina Tashqi ishlar vazirligiga chaqirilib, Rossiyaga tovarlarning reeksport qilinishi nodo‘stona harakat bo‘lishidan ogohlantirildi.
Qozog‘istonga qanday aloqasi bor?
2023-yil may oyida Qozog‘iston hududi orqali Qirg‘izistondan Rossiyaga dronlarni noqonuniy olib o‘tishga urinish bo‘ldi. Chegarachilar 14 ta dronni qo‘lga oldi, ularning har biri, taxminan 6 million tenge turadi. Bojxona xizmati Qirg‘izistondan yetkazib beruvchining bunday tovarlarni yetkazib berish uchun litsenziyasi yo‘qligini aniqladi, shu bois dronlarni Qozog‘iston tomoni musodara qildi.
Izoh (0)