AQSH dronlar ishlab chiqarish bo‘yicha 3 milliard dollardan ortiq xizmatlarni Hindistonga taklif qildi

AQSH Hindistonga mamlakatda ilg‘or dronlarni yaratish uchun 3,1 milliard dollarlik konsalting xizmatlarini taklif qildi.

Bu haqda The Economic Times xabar bermoqda.

Maʼlumotlariga ko‘ra, Amerikaning 31 ta MQ-9B razvedkachi dronlarni sotib olish bo‘yicha Hindiston tomonidan qilingan murojaat yuzasidan muzokaralar chog‘ida takliflar bildirilgan. Kelishuv Hindiston bosh vaziri Narendra Modi raisligida bo‘lajak yig‘ilishida ko‘rib chiqilishi va tasdiqlanishi kutilmoqda. AQSHning konsalting xizmatlari Hindiston tashkilotlari va korxonalariga dronlarni ishlab chiqarish vaqtini qisqartirishga yordam beradi.

Fevral oyida AQSH davlat departamenti MQ-9B Sky Guardian Aircraft dronlari va boshqa tizimlarini Hindistonga 3,99 milliard dollarga konsalting to‘lovlarisiz sotish ehtimolini tasdiqladi. Bo‘lajak kelishuv doirasida Hindiston rasmiylari Qo‘shma Shtatlardan 31 ta MQ-9B Sky Guardian Aircraft dronlari, 170 ta AGM-114R Hellfire raketalari, 310 ta GBU-39B boshqariladigan aviabombalar, ehtiyot qismlar va turli tizimlarni sotib olishga ruxsat so‘ragan.

Hindiston AQSHdan sotib olingan MQ-9B Sky Guardian dronlarini armiya, havo kuchlari va dengiz floti o‘rtasida tarqatishni va dronlarni Pokiston hamda Xitoy bilan chegaralar yaqinidagi oldinga siljish bazalarida joylashtirishni rejalashtirmoqda.