Amerika Qo‘shma Shtatlari 2024—2025-yillarda Tayvanga ALTIUS 600M-V dronlari va o‘q-dorilarini yetkazib berishni rejalashtirmoqda. Bu haqda Tayvan markaziy axborot agentligi ma’lum qildi.
AQSH—Tayvan ishbilarmonlar kengashi prezidenti Rupert Hammond-Chembers agentlikka bu borada hech qanday to‘siq yoki texnik qiyinchiliklarni ko‘rmayotganini va kelgusi 18 oy ichida yetkazib berishni kutayotganini aytdi.
“Belgilangan muddatda dronlar va o‘q-dorilarni yetkazib berish uchun ishlab chiqarish bazasi nuqtayi nazaridan hech qanday muammo yo‘q”, — dedi u.
Bir kun oldin AQSH davlat departamenti Tayvanga 291 dona ALTIUS 600M-V dron va 720 ta Switchblade 300 o‘q-dorilar yetkazib berishini e’lon qilgan edi. Tayvan, shuningdek, uchirish tizimlari, yerdan turib boshqarish qurilmalari va boshqa texnikalarni oladi. Shartnomalar xodimlarni o‘qitish, ehtiyot qismlar bilan ta’minlash va texnik xizmat ko‘rsatishni o‘z ichiga olgan.
Qo‘shma Shtatlar Tayvan armiyasiga asosiy qurol yetkazib beruvchi hisoblanadi. Ayni paytda AQSH orolga yana 19 milliard dollarlik qurol-yarog‘ yetkazib berishi kerak. Pekin Vashingtondan Tayvanga harbiy yordam ko‘rsatishni to‘xtatishni talab qilmoqda, chunki bunday harakatlar Xitoy-Amerika munosabatlariga jiddiy zarar yetkazishi aytilmoqda.
Izoh (0)