Курск вилоятида Россия армияси таркибида жанг қилаётган шимолий кореялик ҳарбийлар Янги йил кечаси маст ҳолатда эди. Бу ҳақда Украина разведкаси хабар берди.
Янги йил кечасида КХДР аскарлари орасида спиртли ичимликларни истеъмол қилиш ҳолатлари кузатилган. 31 декабрь ва 1 январь кунлари улар жангларда қатнашган.
Йўқотишлар ўрнини тўлдириш ва позицияларни кучайтириш учун рус қўмондонлари КХДРнинг янги ҳарбий қўшинларини олдинга ўтказмоқда. 31 декабрь ва 1 январь кунлари Шимолий Корея аскарлари Курск вилоятининг Уланок, Фанасевка, Черкасская Уонополка аҳоли пунктлари яқинидаги позицияларга ўтказилди, дейилади разведка хабарида.
Разведкага кўра, КХДР ҳарбийлари орасида йўқотишлар кўп, бироқ юқори қўмондонликка йўқотишлар ҳақида ёлғон маълумот берилмоқда.
Шимолий Корея аскарларининг жанговар руҳи тушиб кетган. Улар доимий равишда Украинага қарши урушда КХДР армиясининг иштироки “катта аҳамиятга эга”лиги ҳақидаги Россия армия ташвиқоти билан “ишланмоқда”. Янги йил кечасида Шимолий Корея аскарлари, шу жумладан жанговар ҳаракатларга жалб қилинган аскарлар ўртасида спиртли ичимликларни истеъмол қилиш ҳолатлари қайд этилди, дейилади хабарда.
Оқ уйнинг стратегик алоқалар бўйича координатори Жон Кирби бир ҳафта ичида КХДР минг аскарини йўқотгани, ўз жонига қасд қилиш ҳолатлари ҳақида ҳам маълумотлар борлигини айтганди.
Зеленский Россия армияси сафидаги шимолий кореяликлар ҳақида
19 декабрь куни Украина президенти Владимир Зеленский Брюсселда ўтказилган матбуот анжуманида журналистлар саволларига жавоб берар экан, “Россия Шимолий Корея ҳарбийларини ўз фуқаролари сифатида ниқоблайди, ҳалок бўлган аскарларнинг юзларини ёқиб юборади”, деганди. Зеленский ҳозирча жангларда 12 минг атрофида Шимолий Корея ҳарбийси қатнашаётганини айтганди.
Ҳозирча 12 мингдан ортиғини кўряпмиз. Улар ҳарбий хизматчиларимиз қайд этган миқдордан кўпроқ бўладими йўқми, билмайман, кўрамиз. Асирларга келсак, ҳозирча йўқ. Лекин бизда Шимолий Кореянинг ҳалок бўлган аскарлари тасвирланган видео ва фотосуратлар бор. Уларни деярли барчасини Россия паспортлари билан топишмоқда, деган эди Украина президенти.
Изоҳ (0)