Ukrainaga qarshi janglar uchun Rossiyaga yuborilgan Shimoliy Koreya harbiylari orasida 200 dan ortiq qurbonlar qayd etildi. Bu haqda Ukraina Milliy xavfsizlik va mudofaa kengashi huzuridagi Dezinformatsiyaga qarshi kurash markazi rahbari Andrey Kovalenko o‘zining Telegram kanalida ma’lum qildi.
KXDR harbiylari orasida halok bo‘lganlar va yaradorlar soni tobora ortmoqda. Hozirgi vaqtda o‘lganlar va jarohatlanganlarning umumiy soni 200 kishidan oshib ketdi. Rossiyaliklar koreyslarning muvaffaqiyatsizliklarini yashirish uchun ularni jang maydonidan tezroq evakuatsiya qilishga harakat qilyapti. Biroq Shimoliy Koreya harbiylariga zarbalar, ularning muvaffaqiyatsizliklari va jasadlari aks etgan videolar tarqalmoqda. Shuningdek, tarmoqda shifoxonalardan olingan kadrlar ham paydo bo‘ldi, degan rasmiy.
Kovalenkoga ko‘ra, Rossiya Shimoliy Koreya askarlari hayotini qadrlamaydi. Shu bois ulardan front oldida “tirik qalqon” sifatida foydalanmoqda.
Rossiya hamda Shimoliy Koreya o‘rtasida harbiy hamkorlik aloqalari kuchayib bormoqda. Munosabatlar, ayniqsa, ikki davlat keng qamrovli strategik sheriklik to‘g‘risidagi shartnomani ratifikatsiya qilgandan so‘ng yanada rivojlandi.
Pxenyan o‘z ittifoqchisini artilleriya snaryadlari, uzoq masofaga o‘t ochish tizimlari va harbiy kontingent bilan ta‘minlab kelmoqda. Avvalroq Shimoliy Koreya Rossiyadan buning evaziga nimalar olishi xabar qilingandi. Rossiya qo‘mondonligi koreys askarlaridan Kursk yo‘nalishidagi yalpi hujumlarda foydalana boshladi.
Biroq ular til bilmaslik va o‘zaro muvofiqlik yo‘qligi kabi muammolarga duch kelmoqda. Avvalroq bu “do‘stona o‘t ochish” holatlariga sabab bo‘lgani xabar qilingandi.
Izoh (0)