19-aprel kuni AQSH harbiylari Minuteman III qit’alararo ballistik raketasini sinovdan o‘tkazdi. Bu haqda AQSH kosmik kuchlarining Kaliforniyadagi Vandenberg bazasida ma’lum qilindi.
Qayd etilishicha, sinov chog‘ida raketada jangovar kallak bo‘lmagan. U Montana shtatidagi arsenallardan tasodifiy tanlab olingan va Kaliforniyadagi uchirish maydonchasiga olib kelingan. Raketa Tinch okeani ustidan 6,76 ming kilometr masofani bosib o‘tgan.
“Ushbu sinov AQSHning yadroviy tiyib turuvchi kuchi xavfsiz va ishonchli, XXI asr tahdidlarini oldini olishda samarali ekaniga ittifoqchilarni ishontirishga qaratilgan muntazam va davriy saʼy-harakatlarning bir qismidir”, — deya tushuntirdi harbiylar.
Minuteman III — qit’alararo ballistik raketa, u AQSH Qurolli Kuchlari strategik arsenalining asosiy tarkibiy qismi hisoblanadi. Raketa yadro qurolini olib yurishga qodir, uchish masofasi 9 660 kilometr, tezligi 24 000 kilometr/soatgacha chiqishi mumkin.
Minuteman III raketasining avvalgi sinovi fevral oyida bo‘lib o‘tgan edi.
Eslatib o‘tamiz, 14-aprel kuni Shimoliy Koreya birinchi marta “Xvason-18” qit’alararo ballistik raketasini uchirgan edi. Kim Chen In bu sinov “mamlakatning dushman hujumiga yadroviy zarba berishga tayyorligini oshirishi” va “strategik tiyib turuvchi kuchlar tarkibini tubdan qayta qurish” imkonini berishini ta’kidlagan.
“Xvason-18” uchirilganidan keyin Janubiy Koreya, AQSH va Yaponiya harbiylari Yapon dengizida raketaga qarshi mudofaa mashg‘ulotlarini boshladi.
Izoh (0)