Shimoliy Koreya 1-iyul kuni o‘ta yirik yadroviy kallakni olib ucha oladigan ballistik raketani sinovdan o‘tkazgan. Bu haqda mamlakatning KCNA davlat axborot agentligi tarqatgan maʼlumotga asoslanib, Reuters xabar berdi.
Yangi ballistik raketa 4,5 tonnalik o‘ta yirik jangovar kallakni olib uchishga qodirligi aytilgan. Shimol rasmiylari taktik yadroviy raketa sinovlari muvaffaqiyatli o‘tganini xabar qilgan.
Oldinroq ham Shimoliy Koreya harbiylari ikkita ballistik raketa sinovini amalga oshirgan edi. Raketalar Yapon dengizi tomon uchirilgan. Janubiy Koreyaning Yonhap agentligi ballistik raketalardan biri manzilga yetmay qulab tushganini yozgan.
O‘ta og‘ir kallakli ballistik raketaga Pxenyan rasmiylari Xvasongfo-11 Da-4.5 deb nom berishgan. Yangi taktik ballistik raketaning sinovi parvoz barqarorligi va aniqligini tekshirish uchun simulyatsiya qilingan og‘ir kallak yordamida amalga oshirilgan.
Shimol rasmiylari yangi raketa anʼanaviy Xvasong-11 raketasi asosida yaratilganini maʼlum qilgan. Ushbu turdagi raketalari yadro kallagi o‘rnatilgan holatda 600 kilometrgacha masofaga ucha uladi hamda nishonni aylanma tarzda ura oladi.
Janubiy Koreya rasmiylari so‘nggi raketaga KN-23 deb nom bergan. Rasmiylar ayni damda Pxenyan ushbu turdagi raketa sinovi o‘tkazganiga dalillar qidirilayotgani haqida maʼlum qilgan.
Kim Chen In nazoratidagi harbiy maʼmuriyatga ko‘ra, iyul oyi oxirida og‘ir kallakli Xvasongfo-11 raketasining navbatdagi sinovi amalga oshiriladi. Sinov hududi va yo‘nalishi maʼlum qilinmagan.
Izoh (0)