Rossiya armiyasi Kursk viloyatidagi hududlarini qaytarib olish uchun shimoliy koreyalik askarlarni ham o‘z ichiga olgan 50 ming harbiy to‘pladi. Bu haqda AQSH va Ukraina rasmiylariga tayanib, The New York Times xabar berdi.
Yaqin kunlarda harbiylar Ukraina Qurolli kuchlari tomonidan qisman bosib olingan Kursk viloyatida keng ko‘lamli qarshi hujumni boshlashi kutilmoqda. Ayni paytda Shimoliy Koreya qo‘shinlari Kurskning g‘arbiy qismida rossiyaliklar bilan jangovar tayyorgarlikdan o‘tmoqda. Ularning soni 10 mingdan oshishi ma’lum qilingan.
Rossiya Ukrainaning sharqidan qo‘shinlarni ko‘chirmasdan kuchlarini jamlashga erishdi. Bu Moskvaga bir vaqtning o‘zida bir nechta yo‘nalishda bosim o‘tkazish imkonini bermoqda, deb yozadi NYT.
The Washington Post xabar qilishicha, Shimoliy Koreya harbiylari nafaqat Kursk viloyatiga, balki Ukraina bilan chegaradosh bo‘lgan qo‘shni Belgorod viloyatiga ham yuborilgan.
Ukraina hukumati va uning ittifoqchilari oktyabr oyi oxiridan beri Kursk viloyatida Shimoliy Koreya harbiylari borligini ta’kidlaydi. Ularga ko‘ra, KXDR urushda ishtirok etish uchun Rossiyaga 12 mingga yaqin harbiy xizmatchi, jumladan, 500 ofitser va uch nafar generalni yuborgan.
Rossiya va Shimoliy Koreya bu ma’lumotni tasdiqlamagan. Biroq Rossiya prezidenti Vladimir Putin mamlakatda shimoliy koreyalik askarlar borligini rad etmagan.
Izoh (0)