Shimoliy Koreya askarlari hozirda Rossiya qo‘shinlari bilan birga Ukrainaga qarshi urushda qatnashmoqda. Bu haqda AQSH Davlat departamenti matbuot xizmati xabar berdi.
Qayd etilishicha, Pxenyan tomonidan Rossiya sharqiga yuborilgan 10 mingdan ortiq qo‘shinning asosiy qismi Kursk viloyatiga jo‘natilgan.
“U yerda Shimoliy Koreya askarlari Rossiya qurolli kuchlari bilan birgalikda jangovar harakatlarda qatnasha boshladilar”, dedi department vakili.
Ukraina prezidenti Vladimir Zelenskiy avvalroq Shimoliy Koreya askarlari Kursk viloyatida Ukraina armiyasiga qarshi jangovar harakatlarda ishtirok etayotganini aytgan.
“KXDRning 11 ming askari hozirda Kreml qo‘shinlarini qo‘llab-quvvatlash uchun Kurskda bo‘lib turibdi va ular orasida “talafot ko‘rganlar ham bor”, deb yozgan Zelenskiy.
Putin Kursk viloyatini Tramp inauguratsiyasidan avval qaytarmoqchi
The Telegraph nashri Rossiya rahbari Vladimir Putin Ukraina armiyasi tomonidan qisman egallab olingan Kursk viloyatini AQSHning saylangan prezidenti Donald Tramp lavozimiga kirishguncha qaytarib olmoqchi ekani haqida xabar bergan edi.
Ma’lum qilinishicha, Kursk viloyatini 2025-yil 20-yanvargacha, ya’ni Trampning inauguratsiyasigacha qaytarib olish rejalashtirilgan. Bunday qadam Moskvaga kuchliroq pozitsiya bilan tinchlik bo‘yicha har qanday muzokaralarga chiqishga imkon berishi kutilmoqda. Rossiya armiyasi 6-avgustdan beri Ukraina kuchlari tomonidan bosib olingan hududning qariyb yarmini nazorati ostiga olgan.
Bir kun avval Amerikaning The New York Times gazetasi xabar berishicha, umumiy soni 50 ming kishidan iborat Rossiya va Shimoliy Koreya harbiylari guruhi Kursk viloyatida qarshi hujumga tayyorlanmoqda. Janubiy Koreya va AQShning hisob-kitoblariga ko‘ra, Ukrainaga qarshi urushda qatnashish uchun KXDRdan Rossiya Federatsiyasiga 8 mingdan 12 minggacha harbiy xizmatchi olib kelingan.
Shimoliy Koreya Rossiya bilan hamkorlik shartnomasini ratifikatsiya qildi
11-noyabr kuni Shimoliy Koreya Rossiya bilan keng qamrovli strategik sheriklik shartnomasini ratifikatsiya qildi. Tegishli hujjatni KXDR yetakchisi Kim Chen In imzolagan. Bitim tomonlardan biri boshqa davlat tomonidan qurolli hujumga uchrasa va shu tariqa urush holatiga tushib qolsa, “barcha vositalar bilan” harbiy va boshqa yordam ko‘rsatishni nazarda tutadi.
Izoh (0)