Shimoliy Koreya yetakchisi Kim Chen Inning singlisi, Koreya Mehnat partiyasi targ‘ibot va tashviqot bo‘yicha direktor o‘rinbosari Kim Yo Chjon Jo Baydenning agar AQSH yoki uning ittifoqchilariga yadroviy zarba berilsa, KXDRda Kim Chen In “rejimi tugatilishi” haqidagi tahdidlarini bema’nilik deb atadi.
U Baydenni “ertasi yo‘q qariya” deb atadi hamda uning AQSH “xavfsizligi va kelajagi uchun javobgarlikni o‘z zimmasiga olishga” qodir emasligini aytdi.
“E’tibordan chetda qoldirib bo‘lmaydigan yana bir fakt shuki, dushman davlatning bosh qo‘mondoni butun dunyo oldida ochiq va to‘g‘ridan to‘g‘ri ‘rejim tugatilishi’ iborasini ishlatmoqda. Buni keksa odamning ahmoqligi deb hisoblash mumkinmi?” — dedi Kim Yo Chjon.
Bir necha kun oldin Bayden Janubiy Koreya prezidenti Yun Sok Yol bilan muzokaralar yakunlari bo‘yicha brifingda AQSH yoki uning ittifoqchilariga yadroviy zarba berish nomaqbul ekani va bunga qo‘l uradigan har qanday rejim tugatilishini aytgandi.
Bungacha Kim Chen Inning singlisi AQSHni Tinch okeanidagi sinovlar chog‘ida Shimoliy Koreyaning qit’alararo raketasini urib tushirsa, buning oqibatlaridan ogohlantirgan hamda Pxenyan buni urush e’lon qilish deb hisoblashini aytgan edi.
Mart oyi o‘rtalarida Kim Chen In Shimoliy Koreya “yadroga yadro bilan javob beradi, ochiq qarama-qarshilikka, shunday qarama-qarshilik ko‘rsatadi” deb tahdid qilgandi.
Eslatib o‘tamiz, 14-aprel kuni Shimoliy Koreya birinchi marta “Xvason-18” qit’alararo ballistik raketasini uchirgan edi. Kim Chen In bu sinov “mamlakatning dushman hujumiga yadroviy zarba berishga tayyorligini oshirishi” va “strategik tiyib turuvchi kuchlar tarkibini tubdan qayta qurish” imkonini berishini ta’kidlagan.
“Xvason-18” uchirilganidan keyin Janubiy Koreya, AQSH va Yaponiya harbiylari Yapon dengizida raketaga qarshi mudofaa mashg‘ulotlarini boshladi.
Izoh (0)