Shimoliy Koreyaning AQSH yoki uning ittifoqchilariga yadroviy zarba berishga urinishi Kim Chen In rejimining intihosi bo‘ladi. Bu haqda AQSH prezidenti Jo Bayden Oq uyda Janubiy Koreya yetakchisi Yun Suk Yol bilan bo‘lib o‘tgan matbuot anjumanida gapirdi, deb yozmoqda Bloomberg.
“Bunday (yadroviy) hujum nomaqbul bo‘ladi va ushbu harakatlarga qo‘l uradigan har qanday rejimning tugashiga olib keladi”, — dedi Bayden.
Uning taʼkidlashicha, AQSH Janubiy Koreya bilan birgalikda KXDR qo‘lida yadro quroli to‘planishiga qarshi kurashishning yangi usullarini ishlab chiqmoqda. So‘nggi o‘n yil ichida birinchi marta AQSHning atom suvosti kemalari Janubiy Koreya hududida joylashtirilishi mumkin.
“Biz yarimorolga yadro qurolini joylashtirmoqchi emasmiz, lekin portlarni aylanib chiqamiz, yadroviy suvosti kemalarini yuboramiz va hokazo. Bu masalada ortga chekinmaymiz”, — dedi Bayden.
Ikki davlat rahbarlari, shuningdek, muvofiqlashtirishni yaxshilash, strategik qurollar sohasida hamkorlik bo‘yicha maʼlumot almashish va qo‘shma harbiy mashg‘ulotlarni ko‘proq o‘tkazish uchun yadroviy maslahat guruhini tuzishga kelishib olgan.
Eslatib o‘tamiz, 14-aprel kuni Shimoliy Koreya birinchi marta “Xvason-18” qit’alararo ballistik raketasini uchirgan edi. Kim Chen In bu sinov “mamlakatning dushman hujumiga yadroviy zarba berishga tayyorligini oshirishi” va “strategik tiyib turuvchi kuchlar tarkibini tubdan qayta qurish” imkonini berishini ta’kidlagan.
“Xvason-18” uchirilganidan keyin Janubiy Koreya, AQSH va Yaponiya harbiylari Yapon dengizida raketaga qarshi mudofaa mashg‘ulotlarini boshladi.
Izoh (0)