Rossiyalik general-leytenant Igor Kirillovni o‘ldirganlikda gumonlanib hibsga olingan O‘zbekiston fuqarosi Ahmadjon Qurbonovga nisbatan qanday ayblov qo‘yilgani ma’lum bo‘ldi. Bu haqda huquq-tartibot organlariga tayanib, “TASS” xabar berdi.
Ma’lumotga ko‘ra, Qurbonov Rossiya Jinoyat kodeksining bir vaqtning o‘zida uchta moddasi bo‘yicha ayblanmoqda: 105-modda (qasddan odam o‘ldirish), 205-modda (terroristik harakat) va 222-modda (qurolni qonunga xilof ravishda qo‘lga kiritish, berish, sotish, saqlash, tashish, jo‘natish yoki olib yurish).
Qurbonov o‘ta og‘ir jinoyat sodir etganlikda ayblanmoqda, bu umrbod ozodlikdan mahrum qilishga olib kelishi mumkin. Moskvaning Basmanniy sudi 19-dekabr kuni Qurbonovni 2025-yil 17-fevralgacha qamoqda saqlash to‘g‘risida qaror chiqardi.
Hibsga olish to‘g‘risida qaror qabul qilishda O‘zbekiston fuqarosining ilgari sudlanmagani, oilali ekani, qaramog‘ida ikki nafar yosh bola va uch nafar voyaga yetmagan farzandi borligi, shuningdek, u o‘ta og‘ir jinoyatlarda ayblanayotgani inobatga olingan.
Basmanniy sudida ayblanuvchi tergovchining iltimosnomasini hal qilishni sudyaning ixtiyoriga qoldirgan. Uning himoyachisi esa qamoqqa olishga qarshi chiqib, Qurbonov uchun qamoqqa olish bilan bog‘liq bo‘lmagan ehtiyot chorasini qo‘llashni so‘ragan.
Rossiya xavfsizlik xizmati: Kirillovni o‘ldirgan shaxsga 100 ming dollar va’da qilingan
Rossiya Tergov qo‘mitasi 18-dekabr kuni Kirillov va uning yordamchisi Ilya Polikarpovni o‘ldirishda gumonlanayotgan shaxs qo‘lga olingani haqida ma’lum qildi. 1995-yilda tug‘ilgan O‘zbekiston fuqarosi qamoqqa olingan. Rossiyalik huquq-tartibot idoralari xodimlariga ko‘ra, so‘roq paytida u go‘yoki “Ukraina maxsus xizmatlari tomonidan yollangani”ni tan olgan va jinoyatni sodir etgani uchun unga “100 ming dollar miqdorida pul mukofoti hamda Yevropa Ittifoqiga chiqish” va’da qilingani aytilgan.
General Igor Kirillovni o‘ldirish
Kirillov va Polikarpovning portlatib yuborish 17-dekabr kuni sodir bo‘lgan. Ular Moskvaning Ryazan prospektidagi podyezddan chiqayotganda soat 06:00 atrofida portlash oqibatida halok bo‘lgan.
Tergovchilar portlatish moslamasi podyezd yonida turgan samokatga joylashtirilganini aytgan. Kirillovni olib ketish uchun kelgan mashina haydovchisi tirik qolgan.
The Wall Street Journal, Reuters va “Ukrinform” o‘z manbalariga tayanib, portlashda Ukraina maxsus xizmatlarining ishtiroki haqida yozishgan. Ukraina xavfsizlik xizmatidagi manbaning BBCga ma’lum qilishicha, Kirillov “maxsus operatsiya” natijasida “harbiy jinoyatchi” sifatida yo‘q qilingan. Shu bilan birga, Ukraina prezidenti ofisi rahbari maslahatchisi Mixail Podolyak Kiyev terrorchilik usullaridan foydalanmasligini aytgan.
Marhum urushda kimyoviy qurollardan foydalanishni buyurgan
Ukraina Xavfsizlik xizmati ta’kidlashicha, Igor Kirillovning buyrug‘i bilan 2022-yil fevral oyidan buyon Rossiya tomonidan 4800 dan ortiq kimyoviy qurollardan foydalanish holatlari qayd etilgan. Gap CS va CN kabi qo‘zg‘atuvchi ta’sirga ega zaharli moddalar bilan jihozlangan K-1 jangovar granatalari haqida bormoqda.
Ulardan foydalanish 1993-yildan beri Kimyoviy qurolni ishlab chiqish, ishlab chiqarish, qo‘llash va yo‘q qilishni taqiqlash to‘g‘risidagi konvensiya bilan man etilgan. Urush davomida 2000 dan ortiq harbiy turli darajadagi kimyoviy zaharlanish bilan kasalxonalarga tushgan.
Izoh (0)