Rossiya prezidenti Vladimir Putin Qo‘shma Shtatlarga Kiyevga “Oreshnik” tizimidagi raketa bilan zarba berib, “XXI asr yuqori texnologiyali dueli”ni o‘tkazishni taklif etdi.
19-dekabr kuni matbuot anjumani bilan birlashtirilgan to‘g‘ridan to‘g‘ri efirda u G‘arb havo hujumidan mudofaa kuchlarining bunday zarbani qaytarish imkoniyati yo‘qligini ta’kidladi. Bu fikrga qo‘shilmaydiganlarga u “texnologik tajriba o‘tkazish”ni taklif qildi.
Agar G‘arb mutaxassislari “Oreshnik” zarbasini qaytarish mumkin, deb taxmin qilsa, u holda ular bizga va G‘arbda, AQSHda ularga mablag‘ ajratadigan shaxslarga XXI asrning yuqori texnologiyali dueli sifatida muayyan texnologik tajriba o‘tkazishni taklif etishsin. Ular, aytaylik, Kiyevda mag‘lubiyatga uchraydigan biror obyektni aniqlasin, u yerga o‘zlarining barcha havo mudofaasi va raketaga qarshi mudofaa kuchlarini jamlasin, biz esa u yerga “Oreshnik” bilan zarba beramiz. Ko‘ramiz, nima bo‘ladi. Biz bunday tajribaga tayyormiz. Boshqa tomon tayyormi?, deydi Rossiya yetakchisi.
Uning qo‘shimcha qilishicha, “bu Rossiya uchun ham, Amerika tomoni uchun ham foydali bo‘ladi”. Shuningdek, Putin “Oreshnik” “zamonaviy va mutlaqo yangi qurol” ekanligini ta’kidladi.
Putinning aniqlik kiritishicha, “Oreshnik”ning uchish masofasi 5,5 ming kilometrgacha yetadi va dunyoda uni ushlab qoluvchi tizimlar mavjud emas. Rossiya prezidenti AQSHning raketaga qarshi mudofaa tizimini xarajatli va samarasiz deb baholadi.
10-dekabr kuni Pentagon Raketaga qarshi mudofaa agentligi ilk bor o‘rta masofali ballistik raketani muvaffaqiyatli ravishda yo‘q qilganini ma’lum qildi. Bu voqea Tinch okeanning g‘arbiy qismidagi Guam oroli qirg‘oqlarida o‘tkazilgan sinovlar paytida sodir bo‘ldi.
“Oreshnik” raketa tizimi
Putin 21-noyabr kuni Ukrainadagi obyektga ballistik raketa zarbasi berilganini tasdiqlagan edi.
Uning so‘zlariga ko‘ra, sinovlar muvaffaqiyatli o‘tgan, armiya ko‘zlangan maqsadga erishgan: “Dnepropetrovskda Sovet ittifoqi davridan beri eng yirik va mashhur sanoat majmualaridan biri bo‘lgan, bugungi kunda raketa texnologiyalari va boshqa qurollar ishlab chiqaradigan Yujmash zavodi zarar ko‘rgan”.
“Shu paytdan boshlab, biz bir necha bor ta’kidlaganimizdek, avvalroq G‘arb tomonidan qo‘zg‘atilgan Ukrainadagi mintaqaviy mojaro global miqyosda tus oldi”, dedi Rossiya yetakchisi.
Putin o‘z bayonotida Rossiya raketalardan foydalanishdan oldin Ukraina fuqarolarini xavfli zonani tark etish haqida ogohlantirishini ta’kidladi.
“Rossiya tinch yo‘lni afzal ko‘radi, biroq voqealarning har qanday rivojiga ham tayyor, javob doimo tayyor”, deya qo‘shimcha qilgan u.
Izoh (0)