Hokimiyatdan ag‘darilgan Suriya prezidenti Bashar Asad mamlakatni tark etishidan bir necha soat oldin maxsus xizmatlar va armiyaning 30 ga yaqin yuqori martabali xodimlarini yig‘ib, ularga Rossiyadan harbiy yordam allaqachon yetib kelganini aytgan, deb xabar berdi Reuters.
Agentlik suhbatdoshlariga ko‘ra, Asad ish kuni oxirida ofis menejeriga uyga ketayotganini aytagan, lekin buning o‘rniga aeroportga yo‘l olgan.
Nashrning yozishicha, u ukasi Maherni ham ogohlantirmagan, u oxir-oqibat vertolyotda Iroqqa uchib ketgan va u yerdan go‘yoki Moskvaga yo‘l olgan.
“Asadning rafiqasi Asma va uch farzandi u qochib ketgan paytda allaqachon Rossiyada bo‘lgan”, deb yozadi Reuters.
Umuman olganda, Asadning ketishi uning atrofidagilar uchun kutilmagan bo‘lgani haqidagi ma’lumotni agentlikka 10 dan ortiq manbalar tasdiqlagan.
“Asad dastlab BAAga borishni rejalashtirgan, ammo mamlakat Yevropa va Amerika sanksiyalaridan qo‘rqib, uni qabul qilishdan bosh tortdi”, deydi nashr suhbatdoshlari.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.
Izoh (0)