Suriyada qurolli muxolifat qo‘mondonligi ayollar uchun majburiy hijobni taqiqlab, ularning erkin kiyinish huquqini e’lon qildi. Bu haqda Al-Watan gazetasi xabar bermoqda.
Suriya muxolifatining bosh qo‘mondonligi ayollarga ma’lum bir kiyim kiyishni majburlash yoki ularning kiyim tanlash huquqiga har qanday tarzda aralashuvni qat’iyan taqiqlaydi, deyiladi xabarda.
Bundan tashqari, yangi hokimiyat vakillari ayollarning tashqi ko‘rinishi bilan bog‘liq e’tirozlarni bildirish mumkin emasligini belgilab qo‘ygan. Hozirda Suriyadagi muxolifat respublikani boshqaradigan o‘tish organini shakllantirish ustida ish olib bormoqda.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-taroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.
Izoh (0)