Turkiya prezidenti Rajab Toyyib Erdo‘g‘on Suriyadagi hukumatga qarshi kuchlarning hujumini izohlar ekan, “muxolifat yurishi” baxtsiz hodisalarsiz davom etishiga umid bildirdi.
U Suriya prezidenti Bashar Asadga muzokara boshlashni taklif qilganini, biroq u bunga rozi bo‘lmaganini ta’kidladi.
“Biz Asadga qo‘ng‘iroq qildik. Suriya kelajagini birgalikda belgilashni taklif qildik. Afsuski, bu borada ijobiy javob olmadik. Idlib bilan hammasi aniq, Homs muxolifat qo‘lida, gap ularning Damashqqa yurishi haqida ketmoqda. Mintaqa og‘ir ahvolda”, dedi Erdo‘g‘on.
Turkiya yetakchisi iyul oyida Anqara va Damashq o‘rtasidagi munosabatlarni normallashtirish masalasini muhokama qilish uchun Rossiya prezidenti Vladimir Putin va Asadni Turkiyaga taklif qilishga tayyorligini bildirgan edi. Mamlakatlarning diplomatik aloqalari 2012-yilda, Suriyada fuqarolar urushi boshlanganidan bir yil o‘tib uzilgan.
Suriya fraksiyalari koalitsiyasi Suriya shimoli-g‘arbida yurishda davom etar ekan, Turkiya diplomatik bosim va hukumatga qarshi kuchlarni qo‘llab-quvvatlaganlikda ayblovlarga uchradi. Anqara isyonchilar faoliyatiga aloqadorligini rad etmoqda.
Hafta boshida bo‘lib o‘tgan telefon suhbatlarida Putin Erdo‘g‘onga “Anqaraning mintaqadagi mavjud imkoniyatlaridan foydalangan holda” Suriya bo‘ylab tartib o‘rnatish zarurligini aytgan edi.
Suriyadagi vaziyat
Isyonchilarning Halab provinsiyasi g‘arbiy qismida hukumat kuchlariga qarshi keng ko‘lamli hujumi 27-noyabr kuni boshlandi. Ikki kundan so‘ng ular 2016-yildan beri birinchi marta Halab shahriga kirdi. Hujumga Suriyadagi fuqarolar urushi davrida Asadga qarshi chiqqan “Hayot Tahrir ash-Sham” terrorchilik tashkiloti boshchilik qildi.
30-noyabr kuni Suriya armiyasi Halabdan “qo‘shinlarni vaqtincha olib chiqib ketishi”ni e’lon qildi. Ammo Asad Suriya “do‘stlari va ittifoqchilari yordamida terrorchilarni yo‘q qilishga qodir”ligini ishonch bilan ta’kidlab, terrorizmni yo‘q qilishni “mintaqadagi barqarorlik va xavfsizlik” garovi deb atadi.
Suriya prezidenti Bashar Asad mamlakatdagi vaziyat yuzasidan Isroildan yordam so‘radi. Murojaat Asadning Yevropadagi yordamchilaridan biri orqali Isroil tomoniga yetkazilgan. Ushbu so‘rovga yahudiy davlati tanqidiy javob bergan. Jumladan, Isroil hukumati Suriyadagi vaziyat ularni tashvishga solmasligini aytib, “avvalo Suriyadan eronparast ko‘ngillilarni olib tashlash, so‘ngra yordam so‘rash” kerakligini maslahat bergan.
Izoh (0)