Saudiya Arabistoni Suriyadagi diplomatik vakolatxonasini qayta ochish niyatida ekanini ma’lum qildi, deb yozadi Deustche Welle.
Mamlakat Tashqi ishlar vazirligining bildirilishicha, uning vazifasi “qo‘shma arab yondashuvi”ni ishlab chiqishdan iborat bo‘ladi.
7-may kuni Arab davlatlari ligasiga a’zo mamlakatlar tashqi ishlar vazirlari Bashar Asad rejimi tomonidan demokratik norozilik namoyishlarining keskin bostirilishi tufayli 2011-yil noyabrida to‘xtatilgan Suriyaning ushbu tashkilotdagi a’zoligini qayta tiklash qarorini qo‘llab-quvvatladi. Namoyishlar bostirilgach, mamlakatda boshlangan mojaroda shu kungacha 500 ming kishi halok bo‘lgan. Millionlab odamlar o‘z uylarini tashlab ketgan, Suriya infratuzilmasi va sanoati jiddiy zarar ko‘rgan.
Ar-Riyod Damashq bilan diplomatik aloqalarni 2012-yilda uzgan. Shundan so‘ng Saudiya Arabistoni ochiqdan ochiq Asad rejimini ag‘darish tarafdori bo‘lib, fuqarolar urushi fonida suriyalik isyonchilarni qo‘llab-quvvatlagan
Suriyaning boshqa davlatlar bilan munosabatlarini tiklashi
Saudiya Arabistoni Damashqdagi diplomatik missiyasi qayta tiklangani haqida e’lon qilishidan bir necha soat oldin Turkiya TIV 10-may kuni Rossiya poytaxtida Moskva, Damashq, Anqara va Tehronning yuqori darajali diplomatlari yig‘ilishini e’lon qilgandi. Muzokaralar mavzusi “Turkiya va Suriya o‘rtasidagi munosabatlarni normallashtirish bo‘yicha fikr almashish”, shuningdek, hozirda Turkiyada bo‘lgan 3,7 million suriyalik qochqinning o‘z vataniga “ixtiyoriy ravishda qaytishi” bo‘ladi.
Fors ko‘rfazi davlatlari orasida Suriya bilan birinchi bo‘lib BAA aloqalarni tiklagan — u 2018-yilda elchixonasini qayta ochgandi. AFP agentligining yozishicha, Suriyaning boshqa davlatlar bilan aloqalarni tiklashi 2023-yil fevralda Turkiya va Suriyada yuz bergan zilziladan keyin boshlangan.
Izoh (0)