Suriya hukumatiga qarshi qurolli muxolifat kuchlar Damashqqa yaqinlashganda, Rossiya Suriya prezidenti Bashar Asad va uning oilasiga, agar u zudlik bilan ketishga rozi bo‘lsa, “xavfsiz evakuatsiya”ni taklif qilgan. Bu haqda bir nechta noma’lum manbaga asoslanib Bloomberg xabar berdi.
Nashrning ikki manbasi Asadni Rossiyaning Suriyadagi aviabazasi orqali olib ketilganini ta’kidlagan. U bortida bo‘lgan samolyotning transponderi kuzatuvdan qochish uchun o‘chirilgan. Bloomberg’ning uchta anonim suhbatdoshining so‘zlariga ko‘ra, Rossiya Asadni “qurolli guruhlarga qarshi kurashda mag‘lub bo‘lgani”ga ishontirishga harakat qilgan.
Rossiya TIV vakili Mariya Zaxarova brifingda Bashar Asadni evakuatsiya qilishda Rossiya yordami haqidagi savolga javob berar ekan, “insonparvarlik chorasi doirasida zarur darajada yordam ko‘rsatilgani”ni qayd etgan.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.
10-dekabr kuni Idlib shahrida qo‘zg‘olonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan televidenie murojaatida bu lavozimni kamida 2025-yil 1-martgacha egallab turishini ma’lum qildi.
Izoh (0)