Suriya isyonchi jangchilari taxtdan ag‘darilgan prezident Bashar Asadning otasi, sobiq prezident Hofiz al-Asadning qabrini vayron qilishdi.
BBC tomonidan taqdim etilgan videolarda qurollangan shaxslar Latakiya qirg‘oqbo‘yi mintaqasining shimoli-g‘arbidagi Qardahadagi yonayotgan maqbara atrofida yurib, shovqin solayotgani tasvirlangan.
Hayat Tahrir al-Sham (HTSH) islomiy guruhi boshchiligidagi isyonchilar Suriya bo‘ylab yashin tezligida hujum qilib, Asad sulolasining 54 yillik hukmronligini ag‘dardi. Bashar al-Asad Rossiyaga qochib ketdi va u yerda oilasi bilan boshpana oldi.
Suriyaliklar Asadlar hukmronligi tugaganini nishonlab, butun mamlakat bo‘ylab Hofiz va uning o‘g‘li tasvirlangan haykallaru plakatlarni vayron qilishdi.
“2011-yilda Bashar Asad tinch demokratiya tarafdori qo‘zg‘olonni shafqatsizlarcha bostirgan. Bu esa vayronkor fuqarolar urushini keltirib chiqargan edi. Urush natijasida yarim milliondan ortiq odam halok bo‘lgan va yana 12 million kishi o‘z uylarini tashlab ketishga majbur bo‘ldi”, deyiladi BBC xabarida.
Hofiz al-Asad Suriyani 1971-yildan 2000-yilda vafot etgunga qadar boshqargan, so‘ng hokimiyat o‘g‘liga o‘tgan.
U Suriyadagi diniy ozchilikni tashkil etuvchi alaviylar oilasida tug‘ilib o‘sgan. Alaviylarning asosiy aholi markazi Turkiya chegarasi yaqinidagi O‘rta yer dengizi sohilidagi Latakiya viloyatida joylashgan.
Mamlakat aholisining taxminan 10 foizini tashkil etuvchi ko‘plab alaviylar Asadlar uzoq vaqt hokimiyatda bo‘lganida ularning qat’iy tarafdorlari bo‘lgan. Endilikda ularning aksariyati g‘olib isyonchilar tomonidan nishonga olinishidan xavotirda.
9-dekabr kuni HTSH va yana bir sunniy musulmon guruhi — “Ozod Suriya armiyasi” a’zolaridan iborat isyonchilar delegatsiyasi Qardaha oqsoqollari bilan uchrashdi va ularning qo‘llab-quvvatlashiga erishdi.
HTSH va muxolifat isyonchi guruhlar ko‘p yillik fuqarolar urushidan so‘ng 8-dekabr kuni Suriya poytaxti Damashq ustidan nazoratni qo‘lga kiritdi. HTSH rahbari Abu Muhammad al-Jo‘loniy o‘zining haqiqiy ismi Ahmad al-Sharaa ekanini ma’lum qildi. U 2016-yilda Al-Qoida bilan aloqalarini uzgan sobiq jihodchidir. Jo‘loniy, shuningdek, turli diniy guruhlar va jamoalarga bag‘rikenglik va’da qildi.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.
Izoh (0)