Marmelad ko‘rinishidagi bolalar vitaminlari foydadan ko‘ra ko‘proq zarar keltirishi mumkin. Bu haqda “Gazeta.Ru” nashriga bolalar endokrinologi Darya Xaykina ma’lum qildi.
Bunday vitaminlar ko‘rinishi yorqin rangli, ta’mi shirin, qulupnay yoki mango iforli bo‘ladi. Marmeladlarni esa suv bilan ichishga hojat yo‘q. Shu sababli bolalar ularni juda yaxshi ko‘radi.
Shuning uchun “vitaminni bolaga qanday bersam ekan” degan savol tug‘ilmaydi, bolaning o‘zi shirin marmeladni talab qila boshlaydi. Ammo bunday qulaylik ortida turli aldovlar yashiringan bo‘ladi, chunki marmelad shaklidagi vitaminlarda ta’mdan boshqa hech qanday foyda yo‘q”, deydi shifokor.
Endokrinologning ta’kidlashicha, chaynaladigan vitaminlarning asosiy muammolaridan biri ularning tarkibidagi shakar miqdoridir. Ko‘plab ishlab chiqaruvchilar shirin ta’m beruvchilar bilan cheklanmaydi, balki aksincha, marmeladlarga glyukoza siropi, shakar va sun’iy ta’m beruvchilar ham qo‘shadi.
“Atigi 2–3 dona vitaminda 5 grammgacha shakar bo‘ladi. Agar bunday vitaminlar har kuni qabul qilinsa, yiliga deyarli 2 kg qo‘shimcha shakar yig‘iladi. Ko‘pchilik ota-onalar farzandiga shakar bermayapman deb o‘ylaydi, lekin marmeladli vitaminlarda shakar oddiy konfetdan ham ko‘proq bo‘ladi”, deydi shifokor.
Shuningdek, bunday vitamin dozasiga qat’iy rioya qilish ham muhim. Ammo ko‘plab bolalar, tabiiyki, bir dona marmelad bilan cheklanishni istamaydi. Vitaminlar miqdorining ko‘payishi esa yog‘da eruvchi vitaminlar (A, D, E va K) tufayli xavf tug‘diradi. Chunki ular organizmda tez to‘planadi va ortiqcha miqdor zaharlanishga olib keladi. Bundan tashqari, marmeladli vitaminlarda kapsula yoki suyuq ko‘rinishdagi turlarga qaraganda ko‘pincha dozasi past bo‘ladi.
Yana bir muhim jihat: shakar ayrim vitaminlarning o‘zlashtirilishini kamaytiradi. Masalan, C va D vitaminlari shakar bilan yomonroq so‘riladi. Shuningdek, ortiqcha shakar B guruhi vitaminlari, ayniqsa bola o‘sishi va rivojlanishida muhim rol o‘ynaydigan B1 (tiamin) yetishmovchiligini kuchaytirishi mumkin.
Izoh (0)