AQSH ilk bor havo bazasidagi o‘rta masofali ballistik raketani tutib olishga muvaffaq bo‘ldi, deya xabar bermoqda Deutsche Welle.
“Amerikaning Raketalarga qarshi mudofaa agentligi Tinch okeanning g‘arbiy qismidagi Guam qirg‘og‘i yaqinida muvaffaqiyatli sinovlar o‘tkazdi, bu orolning mudofaa qobiliyatida muhim bosqich bo‘ldi”, deydi AQSH Mudofaa vazirligi.
Sinov paytida yangi AN/TPY-6 radari va vertikal uchirish tizimi bilan integratsiya qilingan Aegis Guam tizimi RTX Corp tomonidan ishlab chiqarilgan Standard Missile-3 Block IIA raketasini uchirdi. Pentagonga ko‘ra, ushbu raketa Andersen aviabazasi qirg‘oqlari yaqinida havodan uchirilgan o‘rta masofali ballistik raketani muvaffaqiyatli ushlab olgan.
AQSH Guam orolining havo mudofaasini kuchaytirmoqda
AQSH Raketalarga qarshi mudofaa agentligi direktori Hit Kollins sinovlarni “ulkan guruh yutug‘i” deb atadi va ularning Guam uchun birgalikdagi kuzatuv arxitekturasi hamda havo hujumidan mudofaa va raketaga qarshi mudofaa integratsiyasining samaradorligini tekshirishdagi ahamiyatini qayd etdi.
Bayonotda ta’kidlanganidek, muvaffaqiyatli sinovlar Pentagonning Guam mudofaasini raketa tahdidlaridan mustahkamlashga sodiqligidan dalolat beradi. Ular Guamning takomillashtirilgan havo hujumidan mudofaa va raketaga qarshi mudofaa tizimini yaratish bo‘yicha kengroq tashabbusning bir qismidir.
AQSHga tegishli, ammo uning tarkibiga kirmagan Guam AQSHning eng g‘arbiy shtati — Gavayidan ko‘ra Xitoyga yaqinroq joylashgan strategik harbiy istehkom hisoblanadi.
Reuters’ning aniqlik kiritishicha, “u mintaqada AQSHning potensial dushmanlarini ushlab turishda muhim rol o‘ynaydi”.
The Moscow Times nashriga ko‘ra, AQSHda sinovlar Rossiya 21-noyabr kuni Dnepr shahriga o‘rta masofali “Oreshnik” ballistik raketasidan zarba berganidan ko‘p o‘tmay o‘tkazilgan. Putin ushbu hujumni Rossiya hududiga G‘arb raketalarining qo‘llanishiga javob deya izohlagan.
AQSH Mudofaa vazirligi “Oreshnik”ni 2011-yilda sinovdan o‘tgan RS-26 “Rubej” qit’alararo ballistik raketasining o‘zgartirilgan versiyasi deb hisoblaydi. Buyuk Britaniya Mudofaa vazirligi ham xuddi shunday nuqtayi nazarga ega. Uning ta’kidlashicha, Rossiyada bunday raketalar cheklangan miqdorda mavjud.
Izoh (0)