Rossiya Suriya prezidenti Bashar Asadga uning rejimini muxolifat jangarilaridan qutqarish uchun jiddiy aralashish niyatida emasligini ma’lum qildi.
Sky News Arabia suhbatdoshining so‘zlariga ko‘ra, Asadga Rossiyaning aralashuvi sodir bo‘lsa, bu cheklangan bo‘lishi haqida ma’lum qilingan, chunki Moskvaning endi “boshqa muhim vazifalari” mavjud. Bloomberg agentligining Kremlga yaqin manbasi 2011-yilda rejimi deyarli qulagan va so‘nggi 9 yilda Rossiya armiyasi tufayli omon qolgan Asadni saqlab qolish uchun Moskvaning hech qanday rejasi yo‘qligini tasdiqlagan.
“Asad armiyasi chekinib, birin-ketin shaharlarni topshirayotganini inobatga olsak, bunday qutqaruv rejasi paydo bo‘lishi dargumon”, deydi manba.
6-dekabr kuni “Hay’at Tahrir al-Shom” (HTSH) qurolli muxolifat kuchlari Suriyaning yirik Xoms shahriga yaqinlashdi. O‘tgan hafta oxirida ular mamlakat shimolidagi Halabni egallab olishdi, keyin esa 5-dekabr kuni Hamani egallash uchun janubga yo‘l oldilar. 6-dekabr kuni Suriya demokratik kuchlari deb atalmish kurd bo‘linmalari Suriyaning Dayr az-Zor shahriga kirib, Iroq bilan chegara punktlarini nazoratga olgani ma’lum bo‘ldi.
“Asadning kelajagi hech qachon bugungidek zaif ko‘rinmagan va hozirda Rossiya uni qutqarishga qodir emas, hatto buni xohlamayotgandek ko‘rinadi. Xoms qishloqlarining aksariyati muxolifatni so‘zsiz qo‘llab-quvvatlamoqda va bu tozalash uchun uzoq yo‘l bo‘ladi”, dedi Vashington Yaqin Sharq institutining Suriya va terrorizm hamda ekstremizmga qarshi kurash dasturlari direktori Charlz Lister.
Suriyadagi vaziyat
Isyonchilarning Halab provinsiyasi g‘arbiy qismida hukumat kuchlariga qarshi keng ko‘lamli hujumi 27-noyabr kuni boshlandi. Ikki kundan so‘ng ular 2016-yildan beri birinchi marta Halab shahriga kirdi. Hujumga Suriyadagi fuqarolar urushi davrida Asadga qarshi chiqqan “Hay’at Tahrir al-Shom” terrorchilik tashkiloti boshchilik qildi.
30-noyabr kuni Suriya armiyasi Halabdan “qo‘shinlarni vaqtincha olib chiqib ketishi”ni e’lon qildi. Ammo Asad Suriya “do‘stlari va ittifoqchilari yordamida terrorchilarni yo‘q qilishga qodir”ligini ishonch bilan ta’kidlab, terrorizmni yo‘q qilishni “mintaqadagi barqarorlik va xavfsizlik” garovi deb atadi.
Suriya prezidenti Bashar Asad mamlakatdagi vaziyat yuzasidan Isroildan yordam so‘radi. Murojaat Asadning Yevropadagi yordamchilaridan biri orqali Isroil tomoniga yetkazilgan. Ushbu so‘rovga yahudiy davlati tanqidiy javob bergan. Jumladan, Isroil hukumati Suriyadagi vaziyat ularni tashvishga solmasligini aytib, “avvalo, Suriyadan eronparast ko‘ngillilarni olib tashlash, so‘ngra yordam so‘rash kerak”ligini maslahat bergan.
Izoh (0)