Rossiyaning Ukrainaga qarshi keng ko‘lamli hujumidan so‘ng bitta tobutni tayyorlash narxi 74 foizga oshdi. Bu haqda The Moscow Times xabar berdi.
Ma’lum qilinishicha, narx 2022-yil yanvar oyidagi 4437 rubldan (566 ming so‘m) 2024-yil oktyabr oyida 7711 rublgacha (salkam 984 ming so‘m) oshgan. Tobut narxlarining shiddat bilan o‘sishi urushning dastlabki oylaridan kuzatilgan. 2022-yil fevral—avgust oylarida ularning ishlab chiqarilishi 12 foizga yoki 548 rublga qimmatlashgan.
Safarbarlik e’lon qilinishidan ko‘p o‘tmay, 2022-yil sentyabrda bitta tobut 4998 rublni tashkil etgan, 2023-yil fevralida 33 foiz oshib, 6669 rubl bo‘lgan. Ayrim hududlarda tobutlar bir necha barobar qimmatlashgan: Saxalinda 181 foizga, Omsk viloyatida 162 foizga, Tambov va Smolensk viloyatlarida mos ravishda 104 va 103 foizga (2023-yil uchun).
Qabr qazish ham qimmat
“Rosstat” ma’lumotlariga ko‘ra, qabr qazish ham qimmatlashmoqda: 2022-yil yanvar oyida bu xizmat 7692 rublni (981 ming so‘m), 2024-yil oktyabr oyida esa 9974 rublni (1 million 270 ming so‘m) tashkil etgan, ya’ni 30 foizga oshgan. Shu bilan birga, qabr qazish narxi bo‘yicha rekord 2024 yil fevral oyida — 10 187 rubl (1 million 299 ming so‘m, 2022-yil yanvariga nisbatan 32 foiz) qayd etilgan.
Urushda qurbonlar ko‘payishi bilan Rossiyada marosim xizmatlariga talab ortib bormoqda. Rossiya va Ukraina urushda qancha harbiy halok bo‘lganini rasman e’lon qilmagan. Pentagon ma’lumotlariga ko‘ra, Rossiya armiyasi 615 ming askarni yo‘qotgan. NATO noyabr oyidagi yo‘qotishlarni kuniga 1,5 ming kishiga baholab, buni urush boshlanganidan beri rekord ko‘rsatkich deb atadi. Kamida 48 ming rossiyalik jangchi frontda bedarak yo‘qolgan, deydi Rossiya mudofaa vaziri o‘rinbosari Anna Sivilyeva.
Izoh (0)