Suriya shimoli-g‘arbida oxirgi uch kun ichida janglarda kamida 27 nafar tinch aholi vakili halok bo‘ldi. Bu haqda BMT mintaqaviy gumanitar koordinatori o‘rinbosari Devid Karden ma’lum qilgan.
Uning so‘zlariga ko‘ra, halok bo‘lganlar orasida sakkiz yoshli bolalar ham bor. U o‘ldirilgan bolalarning aniq sonini aytmadi.
“Biz Suriya shimoli-g‘arbida yuzaga kelayotgan vaziyatdan chuqur xavotirdamiz. Tinch aholi va fuqarolik infratuzilmasini nishonga olish mumkinmas va ular xalqaro gumanitar qonunlarga muvofiq himoya qilinishi kerak”, dedi Kardin Reuters agentligiga bergan intervyusida.
27-noyabr kuni Idlib viloyatidagi eng yirik isyonchi anklavni nazorat qiluvchi jangovar guruhlar tomonidan Aleppoga hujum boshlandi. Kecha, 28-noyabr kuni Rossiya Mudofaa vazirligi Suriya harbiylari Rossiya Federatsiyasi ko‘magida Aleppo va Idlibda 400 nafar jangarini yo‘q qilgani haqida xabar berdi.
Isyonchilar va hukumat o‘t ochishni to‘xtatish bo‘yicha kelishuvga erishgan 2020-yildan beri bu hududda mojaro eng keskin nuqtaga chiqdi. Jangarilar o‘z harakatlarini Suriya armiyasi va uning ittifoqdosh eronparast tuzilmalari, jumladan, “Hizbulloh” harakati tomonidan hujumlar soni ortib borayotgani bilan izohlagan.
Rossiya va Suriya harbiy samolyotlari 28-noyabr kuni Suriyaning Turkiya bilan chegarasi yaqinidagi “Hayat Tahrir ash-Shom” jihodchi guruhi nazoratidagi shimoli-g‘arbiy hududlarni bombardimon qilgani haqida xabar berilgan.
Suriya armiyasi kutilmagan kampaniya boshlanganidan keyingi birinchi bayonotida guruhga katta talafotlar berganini ma’lum qilgan.
Armiya o‘z mavqeyini va avvalgi vaziyatni tiklash uchun Rossiya va nomi oshkor etilmagan “do‘st kuchlar” bilan hamkorlik qilayotganini aytgan.
Suriya armiyasidagi manbaga ko‘ra, isyonchilar Halab shahri chekkasidan qariyb 10 kilometr va Livan “Hizbulloh”i nazorat o‘rnatgan shialarning ikki shaharchasi Nubla va Zahra tomon siljigan.
Izoh (0)