Suriya prezidenti Bashar al-Asad 19-may, juma kuni ochilgan Arab davlatlari ligasi (ADL) sammitida ishtirok etish uchun Saudiya Arabistoniga keldi. Suriyaning al-Watan gazetasi yozishicha, Suriya rahbari Jiddada arab davlatlari rahbarlari bilan ikki tomonlama uchrashuvlar ham o‘tkazadi. Asadning ADL ishida ishtirok etishi uning o‘n yildan ortiq izolyatsiyadan so‘ng jahon diplomatik maydoniga qaytishini anglatadi, deb taʼkidlaydi OAV.
2011-yil noyabrda Suriyada hukumatga qarshi namoyishlarning keskin bostirilishi va mamlakatda qurolli mojaroning boshlanish fonida ADL Damashqning ligadagi ishtirokini to‘xtatgan edi. 2012-yilda Saudiya Arabistoni Suriyaning qurolli muxolifati tarafga o‘tib, Asad rejimi bilan aloqalarini uzdi. Aksariyat arab davlatlari ham xuddi shunday pozitsiyaga amal qildi.
Arab davlatlari Asad rejimiga nisbatan munosabatini o‘zgartirmoqda
Biroq Asad rejimining fuqarolar urushi davrida Rossiya va Eron ko‘magida erishgan muvaffaqiyatlari so‘nggi paytlarda mintaqa davlatlarining Suriyaga nisbatan pozitsiyalarini qayta ko‘rib chiqishga majbur qildi. Bu yerda mintaqaviy raqobatchilar — Eron va Saudiya Arabistonining yaqinlashuvi muhim rol o‘ynadi. Bu Xitoy diplomatiyasining sa’y-harakatlari natijasida sodir bo‘ldi.
2023-yil 7-may kuni ADL mamlakatlari tashqi ishlar vazirlari AQSH noroziligiga qaramay, Suriyani tashkilotga qaytarishga qaror qildi. Hozirda arab dunyosida Asad bilan yaqinlashishga yagona qarshi davlat Qatar bo‘lib turibdi. Biroq u Suriyaning ADLga qaytishiga e’tiroz bildirmadi, bu Bashar Asad hokimiyatini qonuniylashtirishda muhim qadam bo‘ldi. Bundan tashqari, ADLga qayta a’zo bo‘lish Damashqqa qo‘shnilari bilan savdo aloqalarini rivojlantirish, shuningdek, Fors ko‘rfazining boy davlatlaridan iqtisodiy yordam va sarmoya olish imkoniyatini berdi.
Izoh (0)