Belarus prezidenti Aleksandr Lukashenko Rossiya yetakchisi Vladimir Putinga Ittifoq davlati doirasida xavfsizlik kafolatlari to‘g‘risidagi bitimni imzolaganidan keyin mamlakatda “Oreshnik” raketasini joylashtirish iltimosi bilan murojaat qildi.
Lukashenkoning so‘zlariga ko‘ra, bunday qaror G‘arb tomonidan kuchayayotgan tahdid sharoitida ham Ittifoq davlatining, ham Belarus hududining mudofaasini kuchaytiradi.
Rossiya prezidenti “Oreshnik” kabi komplekslarni Belarus hududida joylashtirish mumkinligini aytdi.
“Biroq Rossiyaning o‘rta masofaga uchuvchi ballistik raketalarini Belarusda joylashtirish 2025-yilning ikkinchi yarmidagina boshlanishi mumkin”, deydi Putin.
Putin va Lukashenko tomonidan imzolangan xavfsizlik kafolatlari to‘g‘risidagi bitimda “o‘zaro mudofaa majburiyatlari” belgilab qo‘yilgan bo‘lib, kelishuvni amalga oshirish uchun “barcha mavjud kuchlar va vositalar, jumladan Belarus hududida, Rossiyaning allaqachon joylashgan taktik yadro qurollaridan foydalanish mumkinligi” qayd etilgan.
28-noyabr kuni Putin agar Ukraina yadroviy qurolga ega bo‘lsa, Rossiya Federatsiyasi barcha yo‘q qilish vositalaridan foydalanishga majbur bo‘lishini aytgandi. U, shuningdek, Rossiya Ukrainaning yadro maqomiga ega bo‘lishiga yo‘l qo‘ymasligiga ishora qilgan.
Putin, shuningdek, mamlakat “dushman” harakatlariga javoban “Oreshnik”ning jangovar sinovlarini davom ettirishini aytdi.
Uning qayd etishicha, Kiyev bir necha bor Moskva va Sankt-Peterburgdagi davlat ahamiyatiga molik nishonlarga hujum qilishga uringan. Putinga ko‘ra, bunga javoban Bosh shtab va Mudofaa vazirligi Ukraina hududidagi “Oreshnik” tomonidan yo‘q qilinadigan nishonlar ro‘yxatini tuzmoqda.
Putinning so‘zlariga ko‘ra, Rossiyada “Oreshnik”ka o‘xshash, foydalanishga tayyor yana bir qancha komplekslar mavjud. Uning qo‘shimcha qilishicha, “Oreshnik”ning kuchi yadro qurolidan foydalanish bilan taqqoslanadi.
Izoh (0)