Ruminiya Konstitutsiyaviy sudi mustaqil nomzod Kelin Jorjesku g‘alabasi bilan yakunlangan prezidentlik saylovlarining birinchi bosqichi natijalarini bekor qildi.
Jorjesku Rossiya prezidenti Vladimir Putinning vatanparvarligi haqidagi uzoq yillik bayonotlari va NATOni tanqid qilgani uchun Rossiya tarafdori hisoblanadi. Konstitutsiyaviy sud ovozlarni qayta sanab chiqqach, birinchi tur natijalarini tasdiqlaganiga qaramay, shunday qaror qabul qilindi.
Digi 24 telekanali xabar berishicha, 6-dekabr kuni Konstitutsiyaviy sud sudyalari prezidentlik saylovini bekor qilish bo‘yicha ko‘plab murojaatlar tufayli shoshilinch maslahatlashuvlar o‘tkazgan. Konstitutsiyaviy sud “ikkinchi tur o‘tkazilishiga to‘sqinlik qilish va saylovlarni bekor qilish uchun yetarli dalillar mavjudigi”ni ko‘rib chiqqan.
“Saylov jarayoni yangidan boshlanadi, hukumat prezidentlik saylovlarining yangi sanasini belgilashi kerak”, deyiladi sud bayonotida.
Saylovlarning birinchi turi 24-noyabr kuni bo‘lib o‘tgan bo‘lsa, ikkinchi tur 6-dekabrga belgilangan edi. Ruminiya Markaziy saylov komissiyasi saylov natijalari bekor qilingan taqdirda, turlar mos ravishda 15 va 29-dekabr kunlari o‘tkazilishi mumkinligini maʼlum qildi.
Ruminlar ittifoqi uchun o‘ta o‘ngchi alyansning sobiq aʼzosi Jorjesku saylovoldi poygasida autsayder hisoblangan, biroq birinchi turda 22,9 foiz ovoz to‘plagan. U bilan birga Ruminiyani qutqarish ittifoqi yetakchisi Yelena Laskoni (19,8 foiz) ikkinchi turga chiqqan, saylovchilar orasida favorit hisoblanmish bosh vazir Marchel Cholaku esa uchinchi o‘rinni egallagan.
28-noyabr kuni Ruminiya Konstitutsiyaviy sudi Markaziy saylov komissiyasiga birinchi tur natijalarini qayta sanab chiqishni buyurdi, shundan so‘ng natijalar tasdiqlandi.
Bir kun avval Ruminiya prezidenti ma’muriyati “saylov jarayonining haqiqiyligiga ta’sir ko‘rsatishga qaratilgan kiberhujumlar” va “TikTok platformasi unga siyosiy shaxs sifatida belgilanmagan holda taqdim etgan imtiyozlar tufayli Kelin Jorjeskuning ommaviy shon-shuhrati” haqida xabar bergan razvedka hujjatlari sirini ochdi.
Razvedka, shuningdek, “Ruminiya — Rossiyaning gibrid faoliyati, jumladan kiberhujumlar, maʼlumotlarning sizib chiqishi va sabotaj uchun nishon” degan xulosaga keldi. Shundan so‘ng Ruminiya prokuraturasi Jorjeskuning saylovoldi tashviqoti paytida manipulyatsiya va pul yuvish ayblovlari bo‘yicha tergov boshladi.
Izoh (0)