Shimoliy Koreya yetakchisi Kim Chen In yangi kamikadze hujumchi dronlarini sinovdan o‘tkazishni shaxsan o‘zi nazorat qilib, ularni ommaviy ishlab chiqarishni imkon qadar tezroq boshlashni buyurdi.
“Kim Chen In imkon qadar tezroq seriyali ishlab chiqarish tizimini yo‘lga qo‘yish va to‘liq hajmdagi ommaviy ishlab chiqarishga o‘tish zarurligini ta’kidladi”, deyiladi xabarda.
Shimoliy Koreya yetakchisining ta’kidlashicha, dunyo bo‘ylab harbiy dronlardan foydalanish bo‘yicha raqobat kuchaymoqda.
“Bunday obyektiv o‘zgarishlar harbiy nazariya, amaliyot va ta’limning ko‘plab bo‘limlarini zudlik bilan yangilashni talab qiladi”, deya ta’kidlagan Kim.
Reuters: KXDR Janubiy Koreya ustidan dronlar uchirdi
Reuters xabariga ko‘ra, KXDR Janubiy Koreya ustidan, xususan, Seul osmonida va Janubiy Koreya prezidenti Yun Sok Yol idorasi atrofidagi parvozlar taqiqlangan hududda dronlar uchirdi.
Shu munosabat bilan Koreya Respublikasi dronlarni urib tushirish uchun havo mudofaa tizimini joylashtirishga majbur bo‘ldi.
KXDR va Rossiya o‘rtasida har tomonlama strategik sheriklik to‘g‘risidagi bitim
Joriy yil 11-noyabr kuni Shimoliy Koreya Rossiya bilan keng qamrovli strategik sheriklik shartnomasini ratifikatsiya qilgan edi. Tegishli hujjat Kim Chen In tomonidan imzolangan. Rossiya ham uni oldin ratifikatsiya qilgan.
Shartnoma tomonlardan biri boshqa davlat tomonidan qurolli hujumga uchrasa va shu tariqa urush holatiga tushib qolsa, “barcha vositalar bilan” harbiy va boshqa yordam ko‘rsatishni nazarda tutadi.
AQSH Davlat departamenti: Shimoliy Koreya askarlari allaqachon Ukrainaga qarshi urushda qatnashmoqda
AQSH Davlat departamenti matbuot xizmati 12-noyabr kuni Shimoliy Koreya askarlari allaqachon Ukrainaga qarshi urushda qatnashayotgani haqida xabar bergan edi. Unga ko‘ra, Pxenyan tomonidan Rossiya sharqiga yuborilgan 10 mingdan ortiq askarning aksariyati Kursk viloyatiga yuborilgan.
Amerikaning The New York Times nashri 50 ming kishilik Rossiya va Shimoliy Koreya harbiy xizmatchilaridan iborat guruh Kursk viloyatida qarshi hujumga tayyorgarlik ko‘rayotgani haqida xabar bergan edi. Janubiy Koreya va AQSHning hisob-kitoblariga ko‘ra, KXDRdan Rossiyaga 8 mingdan 12 minggacha harbiy xizmatchi olib kelingan.
Izoh (0)