Shimoliy Koreyadan 8000 ga yaqin askar allaqachon Rossiya—Ukraina chegarasiga yetib kelgan va yaqin kunlarda jangovar harakatlarda qatnashishga tayyorlanmoqda. Bu haqda AQSH Davlat departamenti rahbari Entoni Blinken ma’lum qildi.
Blinkenning aytishicha, Rossiya harbiylari shimoliy koreyalik hamkasblariga artilleriya qurollari va dronlardan foydalanish, shuningdek, piyoda qo‘shinlarining asosiy operatsiyalari, jumladan, xandaqlarni tozalashni o‘rgatmoqda.
Avvalroq Pentagon matbuot kotibi Sabrina Singx Shimoliy Koreya qo‘shinlari “yaqin haftalarda Ukraina yaqinidagi Rossiya qo‘shinlarini kuchaytirishi”ni aytgan edi.
Vashingtonning hisob-kitoblariga ko‘ra, Rossiya hududida KXDRning jami 10 mingga yaqin harbiy xizmatchisi bor. Janubiy Koreya ularning sonini 11 ming, Ukrainada esa 12 ming deb hisoblamoqda.
Avvalroq Qo‘shma Shtatlar Xitoyni Rossiyada joylashgan Shimoliy Koreya qo‘shinlarini doimiy joylashish joylariga qaytarishga erishishga chaqirgan edi.
Qayd etilishicha, AQSH prezidentining milliy xavfsizlik bo‘yicha maslahatchisi Jeyk Sallivan ham Shimoliy Koreya qo‘shinlarining Rossiyaga yuborilishi yuzasidan boshqa bir qator davlatlarni Pekin bilan bog‘lanishga ko‘ndirish haqida ko‘rsatma bergan. Biroq CNN suhbatdoshlari G‘arb rasmiylari bu masala bo‘yicha Xitoy Shimoliy Koreyaning rejalariga xalaqit berishiga ishonmasligini aytgan.
Izoh (0)