Shimoliy Koreya Ukrainadagi “adolat kurashida” Rossiyani qo‘llab-quvvatlaydi va maxsus harbiy operatsiyada yorqin zafarlar tilaydi. Bu haqda 7-mart kuni Shimoliy Koreya sotsialistik vatanparvar yoshlar ittifoqi markaziy qo‘mitasi raisi Mun Chol “TASS” agentligiga maʼlum qildi.
“Biz Ukrainadagi voqealarni shunchaki oddiy mojaro yoki oddiy urush deb hisoblamaymiz. Bu rus xalqi va rus yoshlarining o‘z suvereniteti va o‘z davlati xavfsizligi uchun olib borayotgan adolatli kurashidir. Shu boisdan ham biz maxsus harbiy amaliyotni adolatli deb bilamiz. Ishonamizki, Rossiya unda g‘alaba qozonadi. Biz mamlakatni doim qo‘llab-quvvatlaymiz. Shuningdek, ushbu maxsus harbiy operatsiya tezroq va yorqin muvaffaqiyatlar bilan yakunlanishini kutib qolamiz”, — degan Shimoliy Koreya rasmiysi.
Xabarda aytilishicha, so‘nggi haftada Shimoliy Koreya diplomatlarining Moskvaga tashriflari ko‘paygan. Ikki mamlakat rasmiylari Moskvada o‘tayotgan Butunjahon yoshlari festivali asnosida bir qancha uchrashuvlar tashkil etgan.
Shimoliy Koreya rasmiylari uchrashuvlarda maʼlum qilishicha, Rossiya va Ukraina mojarosi yuzaga kelishi uchun suverenitet masalasidan boshqa asos yo‘q. Pxenyandagi hukumat buni tushunadi va har qanday vositalar bilan Rossiyaga yordam berishga tayyor.
Izoh (0)