Italiya prezidenti Serjo Mattarella O‘zbekistonga tashrif buyuradi. Bu haqda Nova agentligi xabar berdi.
Xabarga ko‘ra, Serjio Mattarella Italiyaning Osiyodagi ishtirokini va hozirgi xalqaro panoramada katta strategik ahamiyatga ega ikki davlat bilan hamkorlikni mustahkamlash maqsadida ertaga, 6-noyabr kuni qo‘shaloq missiya bilan Janubiy Koreya va O‘zbekistonga jo‘nab ketadi.
Italiya prezidentga davlat tashrifida uning qizi Laura hamda tashqi ishlar va xalqaro hamkorlik vaziri o‘rinbosari Edmondo Chirielli hamrohlik qiladi. Mattarellaning Seulga tashrifi 7-noyabr kuni milliy qabristonga gul qo‘yish marosimi va Koreya Milliy muzeyida to‘xtash bilan boshlanadi.
8-noyabr kuni delegatsiya Shimoliy Koreya bilan chegaradagi qurolsizlantirilgan Panmunjom qo‘shma xavfsizlik zonasiga tashrif buyuradi. Bu zona Koreya urushi (1950-1953) davrida Inchon-Seul-Suvon uchburchagida tinch aholiga yordam berish uchun dala kasalxonasini tashkil etish orqali xalqaro gumanitar sa’y-harakatlarga hissa qo‘shgan Italiya uchun katta ramziy ahamiyatga ega.
Kunning eng muhim voqeasi Janubiy Koreya prezidenti Yun Suk Yol bilan uchrashuv, so‘ngra rasmiy delegatsiyalar ishtirokidagi muzokaralar bo‘ladi. Unda iqtisodiyot, aerokosmik, fan, texnologiya va madaniyat sohalarida hamkorlikni mustahkamlash, savdo va yarimo‘tkazgichlar sohasida o‘zaro anglashuv memorandumlarini imzolash ko‘zda tutilgan.
Shuningdek, xalqaro miqyosdagi eng dolzarb muammolar, jumladan, Isroil-Falastin mojarosi, Xitoyning Janubiy Xitoy dengizidagi qatʼiyatliligi va Ukrainadagi urush kabilar muhokama qilinadi, bu mavzu O‘zbekistonga tashrifda ham qamrab olinadi.
Italiya prezidentining Koreyaga tashrifi 9-noyabr kuni nihoyasiga yetib, shu kuni u O‘zbekistonga uchib ketadi.
Toshkent bilan hamkorlik Italiya uchun, ayniqsa, mamlakatning Yevropa va Uzoq Sharq, shuningdek, Rossiya va Xitoy kabi yirik mintaqaviy davlatlar o‘rtasidagi tarixiy bog‘lanish mintaqasida joylashgan strategik mavqeyi tufayli alohida ahamiyat kasb etadi.
“Aynan shu kontekstda Rim O‘zbekistonga G‘arb bilan munosabatlarni mustahkamlashda yordam berishi mumkin”, — deyiladi xabarda.
Prezident Italiya va O‘zbekiston sarmoyalarni himoya qilish va ilmiy-madaniy hamkorlik bo‘yicha qator muzokaralarda ham ishtirok etadi, Mattarella 10-noyabr kuni Toshkentda o‘zbekistonlik hamkasbi Shavkat Mirziyoyev bilan uchrashuv o‘tkazishi rejalashtirilgan.
“Shu kuni u Turin Politexnikaning mahalliy shtab-kvartirasida to‘xtashni rejalashtirgan, bu unga universitetlar almashinuvini sarhisob qilish hamda iqtisodiy, texnologik sohalardagi rivojlanish va hamkorlikning yangi salohiyatli yo‘nalishlarini baholash imkonini beradi”, — deyiladi xabarda.
Tashrif 11-noyabr kuni O‘zbekiston hukumati muhim siyosiy va madaniy markazga aylantirishga intilayotgan va Italiya arxeologik missiyasi bilan ishtirok etayotgan Samarqand shahrida yakunlanadi.
Izoh (0)