Germaniya kansleri Olaf Shols Vladimir Putinga qo‘ng‘iroq qilmoqchi, deya Bloomberg xabar berdi.
“Rossiya prezidenti Vladimir Putin va Germaniya kansleri Olaf Shols juma kuni telefon orqali muloqot qilishni rejalashtirmoqda”, deb yozadi nashr.
Shols hafta boshida ARD telekanaliga bergan intervyusida Rossiya rahbari bilan muloqot qilish rejalarini ma’lum qilgan edi. U Putin bilan gaplashish uchun “munosib vaqt” tez orada kelishini aytgan.
Kansler uzoq vaqtdan beri bunday muloqot oldidan ko‘plab aloqalarni amalga oshirib kelayotganini qo‘shimcha qilgan.
Kreml matbuot kotibi Dmitriy Peskov, o‘z navbatida, Moskva Berlindan suhbatga hozircha hech qanday signal olmaganini qayd etgan. Shu bilan birga, u Putin Valday forumida barcha aloqalarga ochiqligini yana bir bor ta’kidlaganini eslatgan.
Rossiya prezidentining rasmiy sayti maʼlumotlariga ko‘ra, Putin va Shols o‘rtasidagi so‘nggi suhbat 2022-yil 2-dekabrda bo‘lib o‘tgan, uning asosiy mavzusi Ukrainadagi vaziyat bo‘lgan.
Shols avvalroq Rossiya prezidenti bilan Ukrainadagi mojaroni hal qilish mavzusini muhokama qilishga tayyorligini tasdiqlagan edi. U mojaroni hal qilish uchun aniq tamoyillarga amal qilish zarurligini aytib, har qanday qaror Ukraina ishtirokida, shuningdek, Germaniyaning hamkor davlatlari kelishuvi bilan qabul qilinishi kerakligini qo‘shimcha qilgan.
Siyosatchi, shuningdek, Ukrainadagi mojaroni muhokama qilish maqsadida Moskva ham, Kiyev ham ishtirok etadigan tadbir o‘tkazish uchun sharoit yaratish kerakligini ta’kidlagan edi.
Izoh (0)