“Putin Germaniya va Fransiya yetakchilari bilan muzokaraga tayyor. Biroq yaqin orada ulardan hech qanday tashabbus bo‘lmadi” — Peskov

Rossiya prezidentining matbuot kotibi Dmitriy Peskov “Izvestiya” nashriga bergan yirik intervyusida, xususan, G‘arb davlatlari rahbarlari bilan ehtimoliy muzokaralar mavzusiga to‘xtaldi.

Peskovning so‘zlariga ko‘ra, Rossiya prezidenti Vladimir Putin Rossiyaga u yoki bu tarzda o‘z maqsadlariga erishishga yordam beradigan har qanday muloqotga hamisha ochiq. “Tinchlik bilan — muzokaralar stolida, lekin buning iloji bo‘lmagan taqdirda, hozir ko‘rib turganimizdek, harbiy yo‘l bilan”, — ta’kidladi Peskov.

Rossiya prezidenti matbuot kotibining aytishicha, Germaniya kansleri Olaf Shols va Fransiya prezidenti Emmanuel Makron “vaziyatdan chiqishning biror yo‘lini izlash uchun Putin bilan muloqotni davom ettirishini” bir necha bor taʼkidlagan. Biroq so‘nggi paytlarda ular tomonidan hech qanday tashabbus bo‘lmagan. Xususan, Kreml matbuot kotibining taʼkidlashicha, Makron Putinga qo‘ng‘iroq qilishga tayyorligi haqida gapirgan bo‘lsa-da, “bunday suhbat uchun hech qanday so‘rov, yo‘nalish yoki ehtimoliy shartlarni ishlab chiqish bo‘lmagan”.

Shuningdek, Peskov Ukrainada Rossiya muzokara olib borishi mumkin bo‘lgan kuchlar borligini ta’kidladi. “Bu kuchlarning bir qismi, kichik bo‘lsa-da, hali ham Kiyevda, bir qismi esa undan tashqarida. Ulardan ba’zilari Rossiyada. Misol uchun, Viktor Medvedchuk shunday kuchlarga tegishli, uning tarafdorlari bor, to‘g‘ri, ular biz xohlaganchalik ko‘p emas”, — dedi Peskov.

Biroq, uning ta’kidlashicha, muzokaralar faqat “maxsus harbiy operatsiya” maqsadlariga erishilgandan keyin muhokama qilinishi mumkin. “Shu vaqtga qadar Ukrainada bo‘lganlar uchun biror tarzda boshini ko‘tarish qo‘rqinchli va jismonan xavfli edi. Ular zudlik bilan yo‘q qilinadi, o‘ldiriladi”, — dedi Rossiya prezidenti matbuot kotibi.

Kreml saytida Putin va Germaniya kansleri Olaf Shols o‘rtasidagi telefon suhbati haqidagi so‘nggi xabar 2022-yil 2-dekabrda berilgan. Ular Rossiya qo‘shinlarining Ukrainaga berayotgan raketa zarbalarini muhokama qilishgan. Kreml matbuot xizmatiga ko‘ra, Putin Fransiya prezidenti bilan oxirgi marta 2022-yil 11-sentabrda gaplashgan. Emmanuel Makron bilan suhbatning asosiy mavzusi rossiyalik harbiylar tomonidan bosib olingan Zaporojye atom elektr stansiyasining xavfsizligi bo‘lgan.