Rossiya prezidenti Vladimir Putin shu hafta Pekinga tashrifi oldidan Xitoyning Ukraina inqirozini tinch yo‘l bilan hal qilish rejasini qo‘llab-quvvatlashini aytdi. Bu haqda Reuters xabar berdi.
Putin yana bir bor Rossiya ikki yildan ortiq urushdan keyin muloqot va muzokaralarga ochiqligini taʼkidladi.
Xitoyning Ukraina inqirozini hal qilish bo‘yicha yondashuvini ijobiy baholaymiz. Pekin haqiqatan ham uning asosiy sabablarini va global geosiyosiy ahamiyatini tushunadi. Si Szinpin Germaniya kansleri Olaf Shols bilan muzokaralarda bayon etgan qo‘shimcha prinsiplar esa Sovuq urush mentalitetini yengish zarurati haqidagi g‘oyani rivojlantiruvchi real va konstruktiv qadamlardir, — dedi Rossiya prezidenti.
2023-yil Xitoy 12 banddan iborat tinchlik rejasini e’lon qildi, unda urushni tugatishning umumiy tamoyillari bayon etilgan, ammo aniqlik kiritilmagan.
AQSH tinchlik rejasiga javoban Xitoy “o‘zini tinchlikparvar sifatida ko‘rsatayotgani”, lekin Rossiya bosqinini qoralamasligini bildirdi. Si Szinpinning qo‘shimcha tamoyillari quyidagilarni o‘z ichiga oladi:
- tinchlikka erishish va g‘arazli manfaatlarni ko‘zlamaslik;
- vaziyatni yumshatish va “olovga moy quymaslik”;
- tinch muzokaralar uchun shart-sharoit yaratish va mojarolarning yanada kuchayishiga yo‘l qo‘ymaslik;
- mojaroning global iqtisodiyotga salbiy ta’sirini minimallashtirish va global sanoat ta’minot zanjirlarining barqarorligini buzmaslik.
Ukraina prezidenti Vladimir Zelenskiyning tinchlik rejasi rus qo‘shinlarini olib chiqib ketish, 1991-yildagi chegaralarini tiklash va Rossiyani harakatlari uchun javobgarlikka tortishni nazarda tutadi. Biroq Moskva hududiy da’vosi sababli mazkur rejaga rozi bo‘lmagan.
Putin 16—17-may kunlari strategik hamkorlik borasida uchrashuv o‘tkazish uchun Xitoyga boradi. Bu tashrif Rossiya prezidentining saylovdagi g‘alabasidan keyingi ilk xorijiy safari bo‘ladi. Rossiya hukumati ushbu safardan katta maqsadlarni ko‘zlagani xabar qilingan.
Izoh (0)